سینتیاگو نیوا کی نظریں ہندوستانی باکسرز کی اولمپک 2028 میں جلد کوالیفکیشن پر

نئی دہلی، 7 اکتوبر (یواین آئی) ہندوستانی خواتین کی باکسنگ ٹیم کی چیف کوچ سینتیاگو نیوا نے کہا ہے کہ ایشین گیمز کے بعد اب ان کی توجہ لاس اینجلس اولمپکس 2028 کے لیے زیادہ سے زیادہ ہندوستانی باکسرز کے کوٹے حاصل کرنے پر ہے۔
اولمپک کوالیفکیشن کا پہلا بڑا موقع 2027 میں قازقستان میں ہونے والی ورلڈ چیمپئن شپ ہوگی۔ نیوا نے کہا کہ ان کی کوشش ہوگی کہ وہاں زیادہ سے زیادہ اولمپک کوٹے حاصل کیے جائیں۔ اس کے بعد ایشین اولمپک کوالیفائر اور 2028 میں مزید دو اولمپک کوالیفائر ہوں گے۔
گلاسگو کامن ویلتھ گیمز میں ہندوستانی خواتین باکسرز نے پانچ طلائی سمیت چھ تمغے جیتے تھے، جبکہ آئچی-ناگویا ایشین گیمز میں بھی ٹیم نے تین تمغے حاصل کیے۔ نیوا نے کہا کہ اگر ہندوستانی باکسرز اگلے سال کے آغاز میں ہی اولمپک کے لیے کوالیفائی کرلیتی ہیں تو انہیں تیاری کے لیے کافی وقت مل جائے گا۔ ان کا مقصد زیادہ سے زیادہ باکسرز کو کوالیفائی کراکر لاس اینجلس کے لیے مضبوط ٹیم تیار کرنا ہے۔
نیوا نے بتایا کہ ہندوستانی ٹیم کے ساتھ 40 افراد پر مشتمل اسٹاف ہے، جس میں تقریباً 20 کوچز اور 20 دیگر معاون عملہ شامل ہے۔ اس کے علاوہ اسپورٹس سائنس، باکسنگ ہال اور باکسنگ آلات سمیت مختلف شعبوں میں بھی بہتری لائی گئی ہے۔
انہوں نے کہا کہ ہندوستان کا موجودہ نظام بین الاقوامی معیار کے بہترین باکسنگ پروگراموں کے برابر ہے۔ نیوا کے مطابق بہت کم ممالک کے پاس اس سے بہتر سپورٹ سسٹم ہے۔ انہوں نے کہا کہ ایشین گیمز کے لیے اچھی تیاری کے باوجود ہندوستانی ٹیم کو اسی پر رکنا نہیں ہے اور اگلے اولمپکس میں بڑی کامیابی حاصل کرنے کے لیے مسلسل آگے بڑھنا ہوگا۔