کشتواڑ؍۷؍ اکتوبر
بارڈر روڈز آرگنائزیشن (بی آر او) نے گلہار۔سنساری روڈ کی ری الائنمنٹ اور اپ گریڈیشن کا کام مکمل کرلیا ہے، جس کے بعد جموں و کشمیر کے کشتواڑ ضلع اور ہماچل پردیش کی پانگی وادی کے درمیان سڑک رابطہ بحال ہوگیا ہے۔
پروجیکٹ سمپرک کے تحت۱۱۸ روڈ کنسٹرکشن کمپنی (آر سی سی) کی نگرانی میں مکمل کیے گئے کام کے دوران گلہار۔سنساری روڈ کے کلومیٹر۵۵ سے۵۸ء۸اور کلومیٹر۶۲ سے۷۱ء۴ کے حصوں میں تبدیلیاں کی گئیں۔
منصوبے کے تحت سڑک کو کلاس۹ سے نیشنل ہائی ویز ڈبل لین (این ایچ ڈی ایل) معیار پر اپ گریڈ کیا گیا ہے، جس کے بعد اس راستے پر دو طرفہ ٹریفک کی آمدورفت ممکن ہوگئی ہے۔
بی آر او کے مطابق کام کے دوران لینڈ سلائیڈنگ کے خطرے والے علاقوں، سرد موسم اور بارشوں سمیت مختلف مشکلات کا سامنا رہا۔۱۱۸ آر سی سی نے کمانڈنگ آفیسر اجے ہوڈا کی قیادت میں منصوبہ مکمل کیا۔
سڑک کی اپ گریڈیشن سے پاڈر علاقے کے تیاری، تھم اور اشتیاری سمیت دیگر دیہات کے لوگوں کو آمدورفت میں سہولت ملنے کی توقع ہے۔ مقامی آبادی کے مطابق سڑک کی بہتری سے صحت، تعلیم اور تجارت سے متعلق ضروریات کے لیے آمدورفت آسان ہوگی۔
گلہار، پاڈر کے رہائشی شنکر سنگھ نے کہا کہ اس سڑک پر سفر طویل عرصے سے مشکل رہا ہے اور اب اس کی بہتری سے مقامی لوگوں کو سہولت ملے گی۔
سردیوں میں برفباری کے باعث اونچے پہاڑی درے بند ہونے کی صورت میں یہ راستہ پانگی وادی تک ضروری سامان اور طبی امداد پہنچانے کے لیے متبادل رابطے کے طور پر استعمال کیا جاسکے گا۔
سڑک کی بہتری سے سیاحوں کی آمدورفت اور مقامی زرعی و باغبانی پیداوار کو منڈیوں تک پہنچانے میں بھی مدد ملنے کی توقع ہے۔
کشتواڑ۔سنساری سڑک جموں و کشمیر کی ڈوڈہ۔کشتواڑ وادی کو ہماچل پردیش کے لاہول اسپیتی خطے سے جوڑتی ہے اور دونوں ریاستوں کے درمیان آمدورفت میں اہم کردار ادا کرتی ہے۔
متعلقہ حکام کے مطابق یہ سڑک دونوں خطوں کے درمیان ضروری اشیاء، زرعی پیداوار اور دیگر سامان کی نقل و حمل میں معاون ہے۔ اس کے علاوہ دور دراز پہاڑی علاقوں کے لوگوں کو صحت، تعلیم اور ہنگامی خدمات تک رسائی فراہم کرنے میں بھی یہ راستہ اہم ہے۔
۔۔۔۔۔۔عامر اقبال خان
