جنتر منتر پر احتجاج نہ کرنے کے پولیس کے حکم کو یوتھ کانگریس نے ہائی کورٹ میں چیلنج کیا

نئی دہلی، 3 اکتوبر (یو این آئی) یوتھ کانگریس نے ووٹر لسٹ کی خصوصی جامع نظر ثانی (ایس آئی آر) کے خلاف یہاں جنتر منتر پر پرامن احتجاج کی اجازت نہ دینے کے پولیس کے فیصلے کو دہلی ہائی کورٹ میں چیلنج کیا ہے۔
یوتھ کانگریس کے ترجمان ورون پانڈے نے ہفتہ کے روز یہ معلومات دیتے ہوئے بتایا کہ یوتھ آرگنائزیشن کے قومی صدر ادے بھانو چب نے دہلی پولیس کے جنتر منتر پر احتجاج نہ کرنے کے یکم اکتوبر کے حکم کے خلاف ہائی کورٹ کا رخ کیا ہے۔ انہوں نے بتایا کہ دہلی پولیس نے یوتھ کانگریس کو اس کے مجوزہ احتجاج کی اجازت دینے سے انکار کیا ہے جس کے خلاف تنظیم کے لیگل سیل کے سربراہ ایڈووکیٹ روپیش سنگھ بھدوریا نے دہلی ہائی کورٹ میں عرضی دائر کی ہے۔ عرضی میں کہا گیا ہے کہ پولیس کسی معاملے میں حالات کا انفرادی اور تناسب کے لحاظ سے اندازہ کیے بغیر پرامن اجتماع پر پابندی نہیں لگا سکتی۔
قابلِ ذکر ہے کہ یوتھ کانگریس نے 25 ستمبر کو تقریباً 100 سے 150 لوگوں کے پرامن احتجاج کے لیے درخواست دیتے ہوئے سکیورٹی، ٹریفک، نظم و ضبط اور عوامی نظام سے متعلق تمام قانونی شرائط کی پابندی کرنے کی یقین دہانی کرائی تھی۔ اس کے باوجود پولیس نے یکم اکتوبر کو اجازت مسترد کرنے کی اطلاع دی جبکہ 2 اکتوبر کو پروگرام مجوزہ تھا۔
عرضی میں آئین کی مختلف دفعات کا حوالہ دیتے ہوئے پولیس کے فیصلے کو چیلنج کیا گیا ہے۔ اس میں سپریم کورٹ کے قائم کردہ عدالتی اصولوں کا بھی حوالہ دیا گیا ہے جو پرامن اجتماع کے حق کی حفاظت کرتے ہیں اور ایسے معاملات میں تناسب کے طریقے سے باقاعدہ بنانے کی ضرورت پر زور دیتے ہیں۔