سرینگر؍۲ستمبر
مرکزی ویجی لینس کمیشن (سی وی سی) کی سالانہ رپورٹ۲۰۲۵ کے مطابق گزشتہ سال سرکاری اداروں کے خلاف بدعنوانی کی۷۰ہزار۵۸۴ شکایات موصول ہوئیں، جن میں سب سے زیادہ شکایات بینکوں اور ریلوے سے متعلق تھیں۔
رپورٹ کے مطابق چیف ویجی لینس افسران (سی وی اوز) کو موصول ہونے والی مجموعی شکایات میں سے۶۴ہزار۹۰۵ کو۳۱ دسمبر۲۰۲۵ تک نمٹا دیا گیا، جبکہ۵ہزار۶۷۹ شکایات زیرِ عمل رہیں۔ ان میں۲۰۰۲ شکایات ایسی تھیں جو تین ماہ سے زائد عرصے سے زیرِ التوا تھیں۔
سی وی اوز سے توقع کی جاتی ہے کہ وہ شکایات کی تحقیقات تین ماہ کے اندر مکمل کریں۔ سی وی سی نے کہا کہ وہ شکایات کے بروقت نمٹارے کو یقینی بنانے کے لیے سی وی اوز کے پاس زیرِ التوا معاملات کا وقتاً فوقتاً جائزہ لیتا ہے۔
اعداد و شمار کے مطابق بینکوں سے متعلق سب سے زیادہ۹ہزار۹۳۳ شکایات موصول ہوئیں، جن میں سے۹ہزار۵۲۰ نمٹا دی گئیں جبکہ۴۱۳ زیرِ التوا رہیں۔ زیرِ التوا شکایات میں۵۲؍ ایسی تھیں جو تین ماہ سے زائد عرصے سے زیرِ التوا تھیں۔
ریلوے کے حوالے سے۹ہزار۳۸۱ شکایات موصول ہوئیں، جن میں سے۸ہزار۷۵۴ کا نمٹارا کیا گیا جبکہ۶۲۷ شکایات زیرِ التوا رہیں۔ ان میں صرف۱۰ شکایات تین ماہ سے زائد عرصے سے زیرِ التوا تھیں۔
رپورٹ میں بتایا گیا کہ وزارتِ ہاؤسنگ و شہری امور سے متعلق۶ہزار۵۳۱ شکایات موصول ہوئیں، جبکہ دہلی کے قومی دارالحکومت خطے کی حکومت کے علاوہ مختلف مقامی اداروں کے خلاف۴ہزار۸۳۴ شکایات درج ہوئیں۔
مقامی اداروں میں دہلی جل بورڈ، دہلی اسٹیٹ انڈسٹریل اینڈ انفراسٹرکچر ڈیولپمنٹ کارپوریشن، دہلی ٹرانسکو، دہلی ٹرانسپورٹ کارپوریشن، دہلی اربن شیلٹر امپروومنٹ بورڈ، دہلی ٹورزم اینڈ ٹرانسپورٹیشن ڈیولپمنٹ کارپوریشن، میونسپل کارپوریشن آف دہلی اور نئی دہلی میونسپل کونسل شامل ہیں۔
اسی طرح کوئلہ شعبے کے ملازمین کے خلاف۴ہزار۱۱۸ ، مالیاتی شعبے سے متعلق۳ہزار۱۰۷‘ دہلی حکومت کے خلاف۲ہزار۸۰۴؍اور وزارتِ پٹرولیم سے متعلق۲ہزار۷۲۲ شکایات موصول ہوئیں۔
رپورٹ کے مطابق دہلی پولیس کے خلاف۲ہزار۶۳۳‘ سڑک نقل و حمل و شاہراہوں سے متعلق۲ہزار۱۳۹؍اور دہلی پولیس کو چھوڑ کر وزارتِ داخلہ سے متعلق۲ہزار۳۶ شکایات درج ہوئیں۔
انسانی وسائل کی ترقی کے شعبے سے متعلق۲۰۳۰ وزارتِ محنت کے خلاف۱۸۹۴، انشورنس کمپنیوں کے خلاف۱۵۳۶؍اور ٹیلی کمیونیکیشن سے متعلق۱۴۶۹ شکایات موصول ہوئیں۔
دفاعی وزارت سے متعلق۱۴۱۰ شکایات، صارفین امور، خوراک و عوامی تقسیم کی وزارت کے خلاف۱۱۲۳‘ فولاد کی وزارت سے متعلق۱۰۲۳؍اور محکمہ ڈاک کے خلاف۱۰۰۳ شکایات درج ہوئیں۔
رپورٹ میں۲۰۲۵ کے دوران سی وی سی کی جانب سے سی وی اوز کو’ضروری کارروائی‘ کے لیے بھیجی گئی شکایات کی تفصیلات بھی شامل کی گئی ہیں۔ ایسی مجموعی طور پر۱۸ہزار۶۵۱ شکایات تھیں۔ ان میں مقامی اداروں سے متعلق۴ہزار۱۱۰ ، بینکوں سے متعلق ایک ہزار۷۴۹، ریلوے سے متعلق۱۴۲۸، وزارتِ پٹرولیم سے متعلق۱۳۱۸، دہلی حکومت سے متعلق۱۳۰۷؍اور وزارتِ دفاع سے متعلق۱۰۱۶ شکایات شامل تھیں۔
رپورٹ کے یہ اعداد و شمار سرکاری اداروں میں بدعنوانی سے متعلق شکایات کے حجم اور مختلف شعبوں میں ان کے نمٹارے کی صورتحال کی نشاندہی کرتے ہیں۔
۔۔۔۔۔۔(ندائے مشرو ق ویب ڈیسک)
