سرینگر؍۳ ستمبر
جنوبی کشمیر کے ضلع اننت ناگ میں بدھ کے روز کھنہ بل ،پہلگام سڑک پر ایک چٹان گاڑی پر گرنے سے ایک سیاح جاں بحق ہوگیا۔
ایک عہدیدار کے مطابق یہ حادثہ متھن کے علاقے میں بمزو شرائن کے قریب پیش آیا، جہاں پہاڑی ڈھلوان سے اچانک ایک بھاری چٹان لڑھک کر سڑک پر آئی اور پہلگام سے اننت ناگ کی جانب جانے والی انوا گاڑی سے ٹکرا گئی۔
گاڑی میں چھ سیاح سوار تھے۔ حادثے میں ایک سیاح شدید زخمی ہوگیا، جبکہ دیگر سیاح، جن میں گاڑی کا ڈرائیور بھی شامل تھا، محفوظ رہے۔
زخمی سیاح کو فوری طور پر گورنمنٹ میڈیکل کالج اننت ناگ منتقل کیا گیا، تاہم ڈاکٹروں نے اسے اسپتال پہنچنے پر مردہ قرار دے دیا۔
متوفی کی شناخت آر ہیمانشو پرساد راؤ ولد آر پال کرشنا راؤ، ساکن گنجام، اوڈیشہ کے طور پر ہوئی ہے۔
پولیس نے واقعے کا نوٹس لیتے ہوئے تحقیقات شروع کردی ہے۔
۔۔۔۔۔ایجنسیاں
