سرینگر؍۳۱؍اگست
لیفٹیننٹ گورنر‘ منوج سنہا نے آج انڈین ریڈ کراس سوسائٹی، جموں و کشمیر یو ٹی کی سالانہ جنرل میٹنگ کی صدارت کی اور اس کی کارکردگی، سرگرمیوں اور مستقبل کے لائحہ عمل کا جائزہ لیا۔
اجلاس میں لیفٹیننٹ گورنر کے پرنسپل سیکریٹری ڈاکٹر مندیپ کے بھنڈاری، انڈین ریڈ کراس سوسائٹی جموں و کشمیر کے جنرل سیکریٹری شوبھنکر پرتیوش پاٹھک، ڈپٹی کمشنران (جو ضلعی ریڈ کراس یونٹس کے صدور بھی ہیں) اور آئی آر سی ایس جموں و کشمیر کے افسران نے شرکت کی۔
لیفٹیننٹ گورنر، جو انڈین ریڈ کراس سوسائٹی جموں و کشمیر یو ٹی کے صدر بھی ہیں، نے ڈپٹی کمشنران کو ہدایت دی کہ وہ وسائل کی فراہمی کے عمل میں تیزی لائیں اور فنڈز پیدا کرنے کے لیے اختراعی ذرائع تلاش کریں تاکہ ریڈ کراس سوسائٹی کی انسانی اور فلاحی سرگرمیوں کو مزید مضبوط بنایا جا سکے۔
انہوں نے انہیں مزید ہدایت دی کہ ترجیحی شعبوں اور اقدامات کی نشاندہی کرتے ہوئے ضلع وار جامع سالانہ سرگرمیوں کے منصوبے تیار کیے جائیں اور مؤثر عمل درآمد کے لیے انہیں پیش کیا جائے۔
ریڈ کراس کی خدمات عوام کے مزید قریب پہنچانے کی ضرورت پر زور دیتے ہوئے لیفٹیننٹ گورنر نے دور دراز اور سرحدی علاقوں میں خدمات کا دائرہ وسیع کرنے پر زور دیا۔انہوں نے ڈپٹی کمشنران کو مشورہ دیا کہ وہ دور دراز علاقوں میں تشخیصی مراکز قائم کرنے کے امکانات تلاش کریں، بالخصوص ان علاقوں میں جہاں لوگوں کو اسپتالوں تک پہنچنے اور ضروری طبی سہولیات حاصل کرنے کے لیے طویل مسافت طے کرنا پڑتی ہے۔
لیفٹیننٹ گورنر نے تپِ دق کے مکمل خاتمے کے لیے مربوط کوششوں میں تیزی لانے اور بنیادی سطح پر ٹی بی کے مریضوں کی مؤثر شناخت، تشخیص، علاج اور مسلسل فالو اَپ کو یقینی بنانے پر زور دیا۔
سنہا نے کہا کہ ریڈ کراس سوسائٹی کو اپنے انسانی ہمدردی کے کردار کو مزید مضبوط بنانا چاہیے اور اپنی سرگرمیوں کو وسعت دینی چاہیے تاکہ جموں و کشمیر بھر میں معاشرے کے کمزور اور ضرورت مند طبقات تک بروقت امداد اور ضروری خدمات پہنچ سکیں۔ انہوں نے آئی آر سی ایس جموں و کشمیر کے افسران کو منشیات کے خلاف مہم مزید تیز کرنے اور نشیلی اشیا سے پاک جموں و کشمیر کی تعمیر میں اپنا قابل قدر کردار ادا کرنے کی بھی ذمہ داری سونپی۔
انڈین ریڈ کراس سوسائٹی جموں و کشمیر کے جنرل سیکریٹری شوبھنکر پرتیوش پاٹھک نے جائزے اور توثیق کے لیے مختلف ایجنڈا نکات پیش کیے۔
اجلاس میں بجٹ تخمینوں، آڈٹ، بلڈ بینکوں اور تشخیصی مراکز میں میڈیکل افسران کی تقرری اور ریڈ کراس سوسائٹی اور اس کی ضلعی سطح کی اکائیوں کی جانب سے انجام دی جانے والی سرگرمیوں سمیت مختلف اہم امور پر بھی تفصیلی غور و خوض کیا گیا۔
ڈپٹی کمشنران نے اپنے اپنے اضلاع میں انجام دی جانے والی سرگرمیوں کے بارے میں لیفٹیننٹ گورنر کو آگاہ کیا اور ریڈ کراس سوسائٹی کی کارکردگی اور خدمات کے دائرہ کار کو مزید مضبوط بنانے کے لیے اپنی تجاویز بھی پیش کیں۔
۔۔۔۔۔۔۔۔۔
(ڈی آئی پی آر )
