وزیر اعظم نے وکرم یان بنانے والی کمپنی اسکائی روٹ کے بانیوں کو مبارکباد دی

نئی دہلی، 18 جولائی (یو این آئی) وزیر اعظم نریندر مودی نے ملک کے پہلے نجی شعبے کے اوربیٹل کلاس راکٹ وکرم-1 کو بنانے والی کمپنی اسکائی روٹ کے بانیوں کو مبارکباد دیتے ہوئے کہا کہ آپ کے کام سے نئی نسل کو کافی تحریک ملی ہے۔
مسٹر مودی نے راکٹ کے کامیاب لانچ کے بعد کمپنی کے بانیوں پون کمار چندانا اور ناگا بھرت ڈاکا کو فون پر ہی مبارکباد دیتے ہوئے کہا، "آپ نے نہ صرف خلا میں ایک نیا پیڑ لگایا ہے، بلکہ نئی نسل کو راغب کرنے کے لیے زمین پر بھی ایک نئی جڑ کو مضبوط کیا ہے۔”
مسٹر مودی نے ان نوجوانوں کی لگن کی ستائش کرتے ہوئے کہا کہ انہوں نے بہت محنت کی ہے۔ انہوں نے کہا، "میں اس نوجوان ٹیم کے ساتھ وہاں موجود رہنا چاہتا تھا۔ میں لانچ پر نظر رکھے ہوئے تھا اور اس سے مجھے بہت خوشی ملی۔ میں اس شاندار کامیابی کے لیے آپ کی پوری ٹیم کو مبارکباد دیتا ہوں۔”
قابلِ ذکر ہے کہ وکرم-1 وزیر اعظم مودی کا ہاتھ سے لکھا ہوا ایک پوسٹ کارڈ بھی لے گیا ہے اور اس پر "وندے ماترم” لکھا گیا تھا۔
اس سے پہلے ملک کے نجی خلائی شعبے نے ہفتہ کو اس وقت تاریخ رقم کی جب اسکائی روٹ ایرواسپیس کمپنی نے شری ہریکوٹا میں ستیش دھون خلائی مرکز (ایس ڈی ایس سی-ایس ایچ اے آر) سے وکرم-1 کو کامیابی کے ساتھ لانچ کر دیا۔ یہ نجی طور پر تیار کردہ اوربیٹل کلاس راکٹ کا ملک کا پہلا کامیاب لانچ تھا۔ مشن آگمن نامی اس پرواز نے اپنے پیلوڈ کو کامیابی کے ساتھ مدار میں بھیج دیا۔
یہ کامیابی ہندوستان کے تجارتی خلائی ماحولیاتی نظام کے لیے ایک اہم لمحہ ہے، جس سے ملک ان چند ممالک میں شامل ہو گیا ہے جہاں ایک نجی کمپنی نے آزادانہ طور پر ایک اوربیٹل کلاس راکٹ کو ڈیزائن، تیار اور لانچ کیا ہے۔
اس کمپنی کی بنیاد 2018 میں، خلائی سائنسدان سے کاروباری بنے پون کمار چندانا اور ناگا بھرت ڈاکا نے رکھی تھی۔ یہ کمپنی 1,000 سے زیادہ ماہرین کی ٹیم کے ساتھ حیدرآباد، تلنگانہ میں ایڈوانسڈ لانچ وہیکل تیار کرتی ہے۔