سرینگر؍۲۹؍اگست
شمالی ریلوے نے کشمیر کے بڈگام اور شری ماتا ویشنو دیوی کٹرہ کے درمیان براہِ راست ٹرین سروس بحال کردی ہے، جس کے ساتھ یہ سروس آج سے دوبارہ شروع ہوگئی ہے۔
شمالی ریلوے کے مطابق یہ ٹرین بڈگام،کٹرہ روٹ پر معمول کے شیڈول کے مطابق چلیں گی۔
ٹرین نمبر 04688 صبح سات بج کر ۲۰منٹ پربڈگام سے روانہ ہوگی اور دوپہر ایک بجے شری ماتا ویشنو دیوی کٹرہ پہنچے گی۔ واپسی پر ٹرین نمبر 04687 دوپہرایک بجکر ۴۵ منٹ پرکٹرہ سے روانہ ہوکر رات۸بجے بڈگام پہنچے گی۔
براہِ راست ٹرین سروس کی بحالی سے کشمیر وادی کے رہائشیوں کے علاوہ کشمیر اور جموں خطے کے درمیان سفر کرنے والے طلبہ، ملازمین اور یاتریوں کو بھی فائدہ پہنچنے کی توقع ہے۔
ریلوے نے کہا کہ یہ سروس وادی اور جموں کے درمیان رابطے کو مزید مضبوط کرے گی اور مسافروں کو سفر کا ایک آسان ذریعہ فراہم کرے گی۔
مسافروں کو مشورہ دیا گیا ہے کہ سفر شروع کرنے سے قبل نیشنل ٹرین انکوائری سسٹم موبائل ایپلی کیشن، انڈین ریلوے کی ویب سائٹ یا ہیلپ لائن۱۳۹ کے ذریعے ٹرین کی تازہ ترین صورتحال اور اوقات کار کی تصدیق کرلیں۔
شمالی ریلوے نے کہا کہ وہ مسافروں کو محفوظ، ہموار اور آرام دہ سفری سہولیات فراہم کرنے کے لیے پرعزم ہے۔
۔۔۔۔۔۔۔
ایجنسیاں
