سرینگر؍ 29 اگست
فوڈ اینڈ ڈرگس ایڈمنسٹریشن (ایف ڈی اے) جموں و کشمیر نے مختلف اضلاع میں فوڈ سیفٹی قوانین کے نفاذ کے لیے وسیع مہم چلائی، جس کے دوران۱۴۰ معائنے کیے گئے اور معیار و حفاظت کی جانچ کے لیے۵۵ غذائی نمونے حاصل کیے گئے۔
حاصل کیے گئے نمونوں میں دودھ اور دودھ سے بنی اشیا، خوردنی تیل، مصالحہ جات اور دیگر غذائی اشیا شامل تھیں۔
مہم کے دوران مختلف فوڈ بزنس آپریٹرز کو فوڈ سیفٹی اینڈ اسٹینڈرڈز ایکٹ۲۰۰۶ کی دفعہ۳۲ کے تحت۱۷ امپروومنٹ نوٹس جاری کیے گئے، جبکہ دفعہ۶۹ کے تحت۱۱ مقدمات نمٹائے گئے اور مجموعی طور پر۱۱ ہزار روپے جرمانہ عائد کیا گیا۔
اس کے علاوہ۹۷ غذائی لیبلز کی مقررہ لیبلنگ ضوابط کے مطابق جانچ کی گئی، جن میں سے دو لیبل غیر موافق پائے گئے۔ ریاسی ضلع میں فوڈ سیفٹی اینڈ اسٹینڈرڈز ایکٹ کی خلاف ورزی پر ایک فوڈ بزنس رجسٹریشن بھی منسوخ کردی گئی۔
ایف ڈی اے کی کارروائی کے دائرے میں فوڈ بزنس ادارے، غذائی اشیا سے متعلق ای کامرس ادارے، دودھ و دودھ کی مصنوعات، خوردنی تیل، مصالحہ جات اور درآمد شدہ غذائی اشیا شامل رہیں۔ پی ڈی ایس، مڈ ڈے میل اور آئی سی ڈی ایس کے ذریعے فراہم کی جانے والی خوراک بھی جانچ کے دائرے میں لائی گئی۔
یہ کارروائیاں جموں، ڈوڈہ، کٹھوعہ، سانبہ، ریاسی، ادھم پور، سرینگر، اننت ناگ، کپواڑہ، بانڈی پورہ، گاندربل اور بڈگام اضلاع میں انجام دی گئیں۔
متعلقہ ڈیزگنیٹڈ افسران اور فوڈ سیفٹی افسران کو ہدایت دی گئی ہے کہ معائنوں، نمونہ گیری، لیبل جانچ اور قانون کے نفاذ کی کارروائیاں جاری رکھیں اور خلاف ورزیوں کے خلاف فوڈ سیفٹی اینڈ اسٹینڈرڈز ایکٹ۲۰۰۶؍اور متعلقہ ضوابط کے تحت کارروائی کریں۔
ایف ڈی اے نے صارفین سے بھی اپیل کی ہے کہ وہ غیر محفوظ، ملاوٹی یا غیر معیاری خوراک کے کسی بھی مشتبہ معاملے کی اطلاع ٹول فری ہیلپ لائن۱۰۴ یا [email protected] پر دیں۔
۔۔۔۔۔۔۔
ایجنسیاں
