ایکواڈور کی عدالت نے سابق صدر لینن مورینو کو رشوت ستانی کیس میں پانچ سال قید کی سزا سنا دی

کویٹو، 29 اگست (یو این آئی) ایکواڈور کی ایک عدالت نے سابق صدر لینن مورینو کو ملک کے سب سے بڑے پن بجلی گھر کی تعمیر سے متعلق رشوت ستانی کے مقدمے میں قصوروار قرار دیتے ہوئے پانچ سال قید کی سزا سنا دی ہے۔ سرکاری استغاثہ کے دفتر نے جمعہ کو اس کی تصدیق کی۔
73 سالہ مورینو کو آئندہ مستقل طور پر کسی بھی سرکاری عہدے پر فائز ہونے سے بھی نااہل قرار دے دیا گیا ہے۔
اٹارنی جنرل کے دفتر نے مارچ 2023 میں تحقیقات کا آغاز کیا تھا، جس میں مورینو، ان کے اہل خانہ اور ایکواڈور و چین سے تعلق رکھنے والے کاروباری شراکت داروں کو کوکا کوڈو سنکلیئر پن بجلی منصوبے سے منسلک مبینہ بدعنوانی کے نیٹ ورک سے جوڑا گیا تھا۔ یہ منصوبہ 2016 میں کام شروع ہوا تھا اور اس کے بعد سے اسے تکنیکی مسائل کا سامنا رہا ہے۔
فیصلہ سناتے ہوئے ٹریبونل کے سربراہ جج مینوئل کیبریرا نے کہا، ’’لینن مورینو کا طرز عمل استغاثہ کی جانب سے عائد کیے گئے الزامات کے مطابق ہے، یعنی ایک سرکاری عہدیدار کی جانب سے رشوت ستانی کا جرم۔‘
اٹارنی جنرل کے دفتر کے مطابق چین کی سرکاری ملکیت والی کمپنی سینو ہائیڈرو نے 2009 سے 2018 کے درمیان جعلی مشاورتی معاہدوں کے ذریعے تقریباً 7 کروڑ 61 لاکھ ڈالر رشوت کے طور پر ادا کیے۔
مورینو کی اہلیہ اور بیٹی کے علاوہ ان کے دو بھائیوں اور ان کی اہلیاؤں کو بھی قصوروار قرار دیتے ہوئے ڈھائی، ڈھائی سال قید کی سزا سنائی گئی۔ ایکواڈور میں چین کے سابق سفیر کائی رونگ گو کو بھی پانچ سال قید کی سزا سنائی گئی۔
تفتیش کاروں کے مطابق رقم بیرون ملک بینک کھاتوں اور ٹیکس سے بچنے کے لیے قائم کی گئی شیل کمپنیوں کے ذریعے منتقل کی گئی، جس کے بعد یہ رقم مورینو کے خاندان اور ان کے ساتھیوں تک پہنچی۔ استغاثہ نے کہا کہ مورینو اور ان کے قریبی رشتہ داروں کو 2007 سے 2013 تک نائب صدر رہنے کے دوران 10 لاکھ ڈالر سے زائد رقم موصول ہوئی۔
مورینو نے مسلسل ان الزامات کی تردید کی ہے اور کہا ہے کہ منصوبے کے معاہدوں پر دستخط کرنے یا ان کی نگرانی میں ان کا کوئی کردار نہیں تھا۔
سماعت کے دوران عدالت سے خطاب کرتے ہوئے مورینو نے کہا، ’’آپ غلط جگہ دیکھ رہے ہیں۔ ان لوگوں کو دیکھیں جنہوں نے معاہدوں پر دستخط کیے اور ان لوگوں کو دیکھیں جنہیں کمیشن طلب کرنے کی عادت تھی۔‘‘
مورینو 2017 سے 2021 تک ایکواڈور کے صدر رہے۔ مقدمے کا سامنا کرنے کے لیے وہ پیراگوئے سے واپس ایکواڈور آئے تھے۔