خواتین ہاکی ورلڈ کپ فائنل میں نیدرلینڈز اور ارجنٹینا آمنے سامنے

ایمسٹلوین، 28 اگست (یو این آئی) نیدرلینڈز اور ارجنٹینا نے جمعرات کو اپنے اپنے سیمی فائنل میں سخت مقابلوں کے بعد کامیابی حاصل کرکے ایف آئی ایچ ہاکی ورلڈ کپ کے فائنل میں جگہ بنا لی۔ دونوں ٹیمیں ہفتہ کو خطاب کے لیے آمنے سامنے ہوں گی۔ یہ 2022 کے ورلڈ کپ فائنل کی بھی تکرار ہوگی، جس میں نیدرلینڈز نے کامیابی حاصل کی تھی۔
ایمسٹلوین میں کھیلے گئے پہلے سیمی فائنل میں تین مرتبہ کی دفاعی چیمپئن نیدرلینڈز نے بیلجیم کو 1-0 سے شکست دی۔ دونوں ٹیموں کے درمیان پہلے ہاف میں سخت مقابلہ رہا، تاہم 28ویں منٹ میں فریڈریکے ماتلا نے شاندار ون ہینڈڈ ڈیفلیکشن کے ذریعے گول کرکے میزبان ٹیم کو برتری دلائی۔ بیلجیم نے برابری کی بھرپور کوشش کی اور میچ کے آخری مرحلے میں فامکے فان ہیل نے گول بھی کیا، لیکن ویڈیو ریویو کے بعد اسے مسترد کردیا گیا۔ نیدرلینڈز نے برتری برقرار رکھتے ہوئے مسلسل آٹھویں مرتبہ ورلڈ کپ فائنل میں جگہ بنالی۔
دوسرے سیمی فائنل میں ارجنٹینا نے آسٹریلیا کو 1-0 سے شکست دے کر ساتویں مرتبہ ورلڈ کپ کے فائنل میں رسائی حاصل کی۔ پہلے دو کوارٹرز میں دونوں ٹیمیں دفاعی طور پر مضبوط رہیں اور زیادہ مواقع پیدا نہ کرسکیں۔ تیسرے کوارٹر میں ارجنٹینا نے دباؤ بڑھایا، لیکن گول نہ ہوسکا۔ بالآخر 47ویں منٹ میں جولیئٹا جونکاناس نے پنالٹی کارنر کے ایک خوبصورت ویری ایشن پر گیند کو جال میں پہنچا کر ارجنٹینا کو برتری دلائی۔ آسٹریلیا نے آخری لمحات میں برابری کی کوشش کی، لیکن ارجنٹینا کی گول کیپر کرسٹینا کوسینٹو نے شاندار دفاع کرتے ہوئے اپنی ٹیم کو فائنل میں پہنچا دیا۔
دریں اثنا، ہندوستانی خواتین ٹیم نے جرمنی کو 3-1 سے شکست دے کر ورلڈ کپ میں پانچویں مقام حاصل کیا، جو 1974 کے بعد اس کا بہترین نتیجہ ہے۔ ایشیکا نے 43ویں منٹ میں ہندوستان کو برتری دلائی، جس کے ایک منٹ بعد نونیت کور نے پنالٹی کارنر پر گول کرکے اسکور 2-0 کردیا۔ آخری کوارٹر کے آغاز میں نونیت نے اپنا دوسرا گول کرتے ہوئے ہندوستان کی برتری 3-0 کردی۔ جرمنی کی لین کرنگس نے اختتامی لمحات میں ایک گول کیا، لیکن ہندوستان نے 3-1 سے کامیابی حاصل کرلی۔
اسپین نے چین کو شوٹ آؤٹ میں 1-0 سے شکست دے کر ساتواں مقام حاصل کیا۔ انگلینڈ نے امریکہ کو 3-1 سے ہرا کر نویں پوزیشن حاصل کی، جبکہ جاپان نے اسکاٹ لینڈ کو 2-1 سے شکست دے کر 11واں مقام حاصل کیا۔ آئرلینڈ نے جنوبی افریقہ کو شکست دے کر 13واں مقام حاصل کیا، جبکہ نیوزی لینڈ نے چلی کو 3-2 سے ہرا کر 15ویں پوزیشن اپنے نام کی۔