چار سال سے کم عمر کے بچوں کے لیے کلورفینیرامائن-فینائلیفرائن مرکب ادویات پر پابندی

نئی دہلی، 22 اگست (یو این آئی) مرکزی حکومت نے چھوٹے بچوں کی صحت اور تحفظ کو مدنظر رکھتے ہوئے کلورفینیرامائن میلی ایٹ اور فینائلیفرائن ہائیڈروکلورائڈ پر مشتمل تمام متعین خوراک کے مرکب (ایف ڈی سی) ادویات کی تیاری، فروخت اور تقسیم پر پابندی عائد کر دی ہے۔
وزارتِ صحت و خاندانی بہبود نے ہفتہ کے روز بتایا کہ ان ادویات کے چار سال سے کم عمر کے بچوں میں استعمال پر بھی روک لگا دی گئی ہے۔
حکومت کی جانب سے جاری کردہ نوٹیفکیشن کے مطابق، ان دونوں دواکے اجزاء پر مشتمل ایف ڈی سی کے لیبل، پیکج انسرٹ اور تشہیری مواد پر واضح انتباہ دینا لازمی ہوگا کہ ان کا استعمال چار سال سے کم عمر کے بچوں کے لیے نہیں کیا جانا چاہیے۔ یہ قدم چھوٹے بچوں میں ان ادویات کے استعمال سے جڑے ممکنہ طبی خطرات کے پیشِ نظر اٹھایا گیا ہے۔
اس سے قبل 15 اپریل 2025 کو جاری کردہ نوٹیفکیشن کے ذریعے کلورفینیرامائن میلی ایٹ اور فینائلیفرائن ہائیڈروکلورائڈ والی کچھ متعین خوراک کے مرکبات پر عمر سے مخصوص انتباہ نافذ کیا گیا تھا۔ اب حکومت نے یہ ضابطہ ان دونوں اجزاء پر مشتمل تمام فارمولیشنز پر نافذ کر دیا ہے۔
حکومت نے یہ فیصلہ ماہر کمیٹی اور ڈرگ ٹیکنیکل ایڈوائزری بورڈ (ڈی ٹی اے بی) کی سفارشات کی بنیاد پر کیا ہے۔ نوٹیفکیشن میں کہا گیا ہے کہ چار سال سے کم عمر کے بچوں میں ایسے مرکب کا استعمال صحت کے لیے خطرہ بن سکتا ہے، جبکہ ان کے محفوظ متبادل دستیاب ہیں۔