ویل اسپن کارپ کو امریکی مینوفیکچرنگ کمپنی سے 1.8 ارب ڈالر کا آرڈر ملا

نئی دہلی، 21 اگست (یواین آئی) لائن پائپ کے کاروبار کی معروف کمپنی ویل اسپن کارپ کو امریکہ کی ایک مینوفیکچرنگ کمپنی سے 1.8 ارب ڈالر (تقریباً 172 ارب روپے) کا آرڈر ملا ہے۔
ویل اسپن کارپ مختلف شعبوں میں کاروبار کرنے والے ویل اسپن ورلڈ گروپ کا حصہ ہے، جو پانچ ارب ڈالر کا گروپ ہے۔ یہ گروپ ہوم سلوشنز، پائپ سلوشنز اور تعمیراتی مواد کے شعبوں میں کاروبار کرتا ہے۔ یہ کمپنی کی تاریخ کا سب سے بڑا آرڈر ہے۔
کمپنی نے جمعہ کو بتایا کہ یہ آرڈر مالی سال 2027-28 اور 2028-29 کے دوران مکمل کیا جائے گا۔ اس سے کمپنی کی آرڈر بک کافی مضبوط ہوگی اور آنے والے کئی برسوں کے لیے آمدنی کی صورتحال بہتر ہوگی۔ اس آرڈر سے شمالی امریکہ کی توانائی کے بنیادی ڈھانچے کی مارکیٹ میں ویل اسپن کارپ کی پوزیشن مزید مضبوط ہوگی، جہاں کمپنی نے اپنی مینوفیکچرنگ صلاحیتوں کو وسعت دینے کے لیے مسلسل سرمایہ کاری کی ہے۔
ویل اسپن ورلڈ کے چیئرمین بی. کے. گوئنکا نے کہاکہ ’’شمالی امریکہ ہمارے لیے حکمت عملی کے اعتبار سے ایک اہم مارکیٹ رہا ہے۔ اس خطے میں اپنی مینوفیکچرنگ اور تکنیکی صلاحیتوں کو مضبوط کرنے کے لیے ہم نے وقت سے پہلے مسلسل سرمایہ کاری کی ہے۔ ہم معیار، جدت اور بہترین کارکردگی پر اسی طرح توجہ مرکوز رکھتے ہوئے آگے بڑھنے کے لیے پرعزم ہیں، جنہوں نے اب تک کے ہمارے سفر کو متعین کیا ہے۔‘‘
اس آرڈر کے ساتھ ویل اسپن کارپ کی عالمی آرڈر بک 4.4 ارب ڈالر (تقریباً 42,100 کروڑ روپے) کی ریکارڈ سطح پر پہنچ گئی ہے۔