ڈی آر آئی نے اسمگلنگ کرنے والے گروہ کا پردہ فاش کیا، ہاتھی دانت سے بنی 54 نوادرات ضبط

نئی دہلی، 20 اگست (یواین آئی) محکمہ محصولات کی خفیہ اطلاعاتی ایجنسی (ڈی آر آئی) نے جنگلی حیات کی اسمگلنگ کرنے والے ایک گروہ کا پردہ فاش کرتے ہوئے ہاتھی دانت سے بنی 54 باریک نقش و نگار والی اشیا ضبط کرنے میں بڑی کامیابی حاصل کی ہے۔
ایک سرکاری بیان کے مطابق، ہاتھی دانت سے بنی اشیا کی غیر قانونی تجارت کے بارے میں موصولہ خفیہ اطلاع کی بنیاد پر ڈی آر آئی کے افسران نے لکھنؤ میں منصوبہ بند کارروائی کی اور جنگلی حیات سے متعلق اشیا کی غیر قانونی تجارت میں ملوث گروہ کے چار افراد کو گرفتار کرلیا۔ ان کے قبضے سے ہاتھی دانت سے بنی 54 بہترین فن پارے برآمد ہوئے۔
ان میں بیل، ہاتھی اور کتے جیسے جانوروں کی شکلیں، جنگجوؤں اور بچے کو گود میں لیے ہوئے ماں جیسے انسانی مجسمے، اور قینچی، کنگھی، اگربتی اسٹینڈ اور سندور دانی جیسی دیگر اشیا شامل ہیں۔
برآمد کی گئی یہ تمام اشیا انتہائی نفیس اور باریک نقش و نگار کی حامل ہیں اور ان کی تجارتی مالیت کافی زیادہ ہوسکتی ہے۔ ان فن پاروں اور گرفتار کیے گئے گروہ کے چاروں افراد کو مزید تحقیقات کے لیے اتر پردیش کے محکمہ جنگلات کے حوالے کردیا گیا ہے۔
اس سے قبل جولائی کے دوران کی گئی دو الگ الگ کارروائیوں میں ڈی آر آئی نے راجستھان کے سوجان گڑھ میں 11 کلو ہاتھی دانت اور ہوڑہ (کولکاتا) میں ہاتھی دانت سے بنی دیوی دیوتاؤں کی دو انتہائی باریک نقش و نگار والی مورتیاں ضبط کی تھیں۔
مئی میں ڈی آر آئی نے کرناٹک کے میسور میں بھی ایک اسمگلنگ گروہ کا پردہ فاش کرتے ہوئے چار کلو ہاتھی دانت ضبط کیا تھا۔