یش گرگ کی آل راؤنڈ کارکردگی، میرٹھ ماویرکس کی سنسنی خیز جیت

لکھنؤ، 15 اگست (یواین آئی) یش گرگ کی شاندار آل راؤنڈ کارکردگی کی بدولت میرٹھ ماویرکس نے یوپی ٹی-20 لیگ سیزن-4 کے افتتاحی مقابلے میں دفاعی چیمپئن کاشی رودراس کو آخری گیند پر ایک وکٹ سے شکست دے کر فاتحانہ آغاز کیا۔
کاشی رودراس نے پہلے بلے بازی کرتے ہوئے 20 اوورز میں 118 رنز بنائے۔ یش گرگ نے چار اوورز میں 19 رنز دے کر چار وکٹیں حاصل کیں، جبکہ جیشان انصاری نے تین اور وشال چودھری نے دو وکٹیں لیں۔ کاشی کی جانب سے ابھیشیک گوسوامی نے 42 رنز بنائے۔
119 رنز کے ہدف کے تعاقب میں میرٹھ نے 9 وکٹوں پر آخری گیند پر کامیابی حاصل کی۔ کپتان رنکو سنگھ نے 28 اور دیویانش راجپوت نے 26 رنز بنائے۔ آخری اوور میں میرٹھ کو 19 رنز درکار تھے، تاہم یش گرگ نے شاندار بلے بازی کرتے ہوئے چوکا اور دو چھکے لگائے اور آخری گیند پر ایک رن لے کر ٹیم کو فتح دلائی۔
یش گرگ نے 14 گیندوں پر ناٹ آؤٹ 26 رنز بنانے کے ساتھ چار وکٹیں حاصل کرکے میچ کے ہیرو کا اعزاز حاصل کیا۔