اسٹیو اسمتھ نے ٹیسٹ کرکٹ میں سب سے زیادہ کیچز کا عالمی ریکارڈ برابر کردیا

ڈرون، 15 اگست (یواین آئی) آسٹریلیا کے اسٹار بلے باز اسٹیو اسمتھ نے ٹیسٹ کرکٹ میں سب سے زیادہ کیچ لینے کا عالمی ریکارڈ برابر کرکے تاریخ میں اپنا نام درج کرلیا۔ بنگلہ دیش کے خلاف جاری پہلے ٹیسٹ کی پہلی اننگز میں اسمتھ نے تین کیچ لیے، جس کے ساتھ ان کے ٹیسٹ کیچز کی تعداد 218 ہوگئی۔
37 سالہ اسمتھ نے 124 ٹیسٹ میچوں کی 236 اننگز میں 218 کیچ مکمل کیے، جبکہ انگلینڈ کے جو روٹ نے 166 ٹیسٹ میچوں کی 317 اننگز میں اتنے ہی کیچ لیے ہیں۔ روٹ 19 اگست سے لیڈز میں پاکستان کے خلاف شروع ہونے والی تین ٹیسٹ میچوں کی سیریز میں انگلینڈ کی قیادت کریں گے۔
بنگلہ دیش کے خلاف اسمتھ نے جوش ہیزل ووڈ کی گیند پر کپتان نجم الحسن شانتو کا کیچ لے کر اپنا کھاتہ کھولا۔ اس کے بعد مچل اسٹارک کی گیند پر لٹن داس کا کیچ پکڑا اور اگلے اوور میں مشفق الرحیم کا کیچ لے کر روٹ کے ریکارڈ کی برابری کرلی۔
ٹیسٹ کرکٹ میں سب سے زیادہ کیچ لینے والے کھلاڑیوں کی فہرست میں روٹ اور اسمتھ کے بعد راہل دراوڑ 210، مہیلا جے وردھنے 205 اور جیک کیلس 200 کیچ کے ساتھ موجود ہیں۔
اسمتھ نے ڈارون ٹیسٹ کی پہلی اننگز میں آسٹریلیا کے لیے نصف سنچری بھی بنائی ہے۔ اب ان کے پاس بنگلہ دیش کی دوسری اننگز میں کم از کم ایک کیچ لے کر ٹیسٹ کرکٹ میں سب سے زیادہ کیچ لینے والے کھلاڑی بننے کا موقع ہے۔