سرینگر/۱۵ ؍اگست
کشمیر میں۸۰ واں یومِ آزادی حب الوطنی کے جذبے اور جوش و خروش کے ساتھ منایا گیا۔ اس موقع پر وزیرِ اعلیٰ عمر عبداللہ نے سرینگر کے بخشی اسٹیڈیم میں مرکزی تقریب کی صدارت کی۔
عمر عبداللہ نے قومی پرچم لہرایا اور یومِ آزادی کی پریڈ میں حصہ لینے والے دستوں کا معائنہ کیا، جس کے دوران انہیں رسمی گارڈ آف آنر بھی پیش کیا گیا۔
اس موقع پر ایک ہیلی کاپٹر نے اسٹیڈیم کے اوپر سے پھولوں کی پتیاں نچھاور کیں، جس پر وہاں موجود لوگوں نے زوردار تالیاں بجا کر خوشی کا اظہار کیا۔
تقریب میں سابق وزرائے اعلیٰ، نیشنل کانفرنس کے صدر فاروق عبداللہ، پیپلز ڈیموکریٹک پارٹی کی صدر محبوبہ مفتی، قانون ساز اسمبلی میں قائدِ حزبِ اختلاف سنیل شرما اور سرینگر سے تعلق رکھنے والے نیشنل کانفرنس کے ارکانِ اسمبلی نے شرکت کی۔
سینئر سول انتظامیہ اور پولیس کے افسران بھی اس موقع پر موجود تھے۔
وادی کے تمام ضلعی صدر مقامات پر بھی یومِ آزادی کی تقریبات منعقد کی گئیں۔
بارہمولہ میں وزیرِ زراعت جاوید احمد ڈار نے پریڈ کی سلامی لی، جبکہ اننت ناگ میں اسکولی تعلیم کی وزیر سکینہ ایتو نے تقریب کی صدارت کی۔
باقی اضلاع میں متعلقہ ڈپٹی کمشنروں نے قومی پرچم لہرایا اور پریڈ کی سلامی لی۔وادی میں جہاں جہاں یومِ آزادی کی سرکاری تقریبات منعقد ہوئیں، وہاں پُرامن جشن کو یقینی بنانے کے لیے سخت حفاظتی انتظامات کیے گئے تھے۔
تقریبات کے مقامات کے اطراف بڑی تعداد میں سکیورٹی اہلکار تعینات کیے گئے تھے تاکہ صرف مجاز اور حقیقی افراد کو ہی تقریب میں داخلے کی اجازت دی جائے۔
تاہم لوگوں کی نقل و حرکت پر کسی قسم کی پابندی عائد نہیں کی گئی۔ موبائل انٹرنیٹ خدمات بھی بلا کسی رکاوٹ کے معمول کے مطابق جاری رہیں۔
۔۔۔۔۔۔
ایجنسیاں
