دچھن ۱۵/؍اگست
پہاڑی ضلع کشتواڑ کے دچھن علاقے میں ہفتہ کو ایک دلخراش سڑک حادثے میں پانچ افراد، جو تمام مزدور تھے، جاں بحق ہوگئے۔ حادثہ اس وقت پیش آیا جب ان تمام افراد کو لے جانے والی گاڑی سڑک سے بے قابو ہوکر ایک کھڑی پہاڑی سے نیچے لڑھک گئی اور بالآخر ایک نالے میں جاگری۔
حادثے کے فوراً بعد مقامی لوگوں اور پولیس اہلکاروں نے امدادی کارروائی شروع کی اور گاڑی میں سوار تمام پانچ افراد کی لاشیں نکال لی گئیں۔
جاں بحق ہونے والوں کی شناخت یاسر ملک ولد غلام حیدر ملک، ساکن سوئڈ؛ محسن ولد غلام رسول ساگر، ساکن ٹنڈر؛ محمد یونس شاہ ولد محمد اشرف شاہ، ساکن سوئڈ؛ مراد احمد، ساکن رام بن؛ اور صدام، ساکن نیل ٹاپ، رام بن (بانہال) کے طور پر ہوئی ہے۔
کشتواڑ کے ڈپٹی کمشنر پنکج شرما نے بتایا کہ حادثہ صبح تقریباً ساڈھے دس بجے پیش آیا اور تمام جاں بحق افراد دنگدورو میں پاکل ڈل پروجیکٹ میں مزدور کی حیثیت سے کام کر رہے تھے۔
شرما نے بتایا کہ گاڑی مدھوسودن نالے میں جاگری، تاہم کھڑی پہاڑی سے نیچے لڑھکتے وقت شدید جھٹکوں کے باعث گاڑی میں سوار افراد باہر جاگرے۔
حادثے کا شکار ہونے والی اسکارپیو گاڑی، پکل ڈل ہائیڈرو الیکٹرک پروجیکٹ کے دنگدورو مقام سے ساؤنڈر کی جانب جارہی تھی، جب یہ ٹنڈر کے قریب یائیون کے مقام پر ایک کھڑی پہاڑی سے لڑھک کر مدھوسودن نالے میں جاگری۔ مدھوسودن، دریائے چناب کی ایک معاون ندی ہے۔
وزیر مملکت برائے پی ایم او ڈاکٹر جتیندر سنگھ نے بھی حادثے پر گہرے صدمے کا اظہار کیا ہے۔
سوشل میڈیا پلیٹ فارم ایکس پر جاری ایک پیغام میں انہوں نے کہا:’’دچھن علاقے میں سڑک حادثے کی اطلاع ملنے کے بعد کشتواڑ کے ڈپٹی کمشنر شری پنکج کمار شرما سے بات کی۔ حادثے میں ایک اسکارپیو گاڑی یائیون کے مقام پر گہری کھائی میں جاگری۔ بدقسمتی سے گاڑی میں سوار تمام پانچ مسافروں کی موقع پر ہی موت ہوگئی۔ ایک امدادی ٹیم جائے حادثہ پر پہنچ چکی ہے۔‘‘انہوں نے جاں بحق افراد کے اہل خانہ سے دلی تعزیت اور ہمدردی کا اظہار کیا۔
پولیس نے اس سلسلے میں مقدمہ درج کرلیا ہے اور حادثے کی وجوہات معلوم کرنے کے لیے تحقیقات شروع کردی ہے۔
۔۔۔۔۔
ایجنسیاں
