ٹاٹا اسٹیل ‘جمشید پور فٹبال اینڈ اسپورٹنگ پرائیویٹ لمیٹڈ’ کو 100 روپے میں چرچل برادرس کو فروخت کرے گی

ممبئی، 14 اگست (یو این آئی) ٹاٹا اسٹیل نے ‘جمشید پور فٹبال اینڈ اسپورٹنگ پرائیویٹ لمیٹڈ’ (جے ایف ایس پی ایل) میں اپنی ایکویٹی حصہ داری چرچل برادرس فٹبال کلب کو 100 روپے کی برائے نام رقم کے عوض منتقل کرنے پر رضامندی ظاہر کی ہے۔
دونوں فریقین کے درمیان جمعہ کو اس سلسلے میں معاہدہ ہوا۔ فروخت کا عمل 31 اگست 2026 تک مکمل ہونے کی امید ہے۔ ٹاٹا اسٹیل کے بورڈ آف ڈائریکٹرز نے 30 جولائی 2026 کو ہوئی میٹنگ میں اس سودے کی منظوری دی تھی۔ جے ایف ایس پی ایل کی نیٹ ورتھ 31 مارچ 2026 کو 5.8 کروڑ روپے منفی تھی۔ مالی سال 26-2025 میں اس کا کل کاروبار 32.23 کروڑ روپے کا تھا۔
ٹاٹا اسٹیل نے جمعہ کو بتایا کہ یہ منتقلی آل انڈیا فٹبال فیڈریشن کے قواعد و ضوابط کے مطابق کی گئی ہے۔ اس میں کلب کے انڈین سپر لیگ (آئی ایس ایل) کے اسپورٹنگ لائسنس کے ساتھ ساتھ 12 کھلاڑیوں اور دو کوچوں کی منتقلی بھی شامل ہے۔ چرچل برادرس ستمبر 2026 سے جمشید پور فٹبال کلب (جے ایف سی) کے تمام کھلاڑیوں اور کوچنگ اسٹاف کے معاہدے اپنے تحت لے لے گا۔ اس سے انہیں آئی ایس ایل میں اپنا پیشہ ورانہ فٹبال کیریر جاری رکھنے کا موقع ملے گا۔
چرچل برادرس گوا کا جانا پہچانا فٹبال کلب ہے۔ اس نے دو آئی لیگ کے خطاب جیتے ہیں اور ہندوستانی گھریلو فٹبال میں اس کا مضبوط ریکارڈ رہا ہے۔
ٹاٹا اسٹیل میں کارپوریٹ سروسز کے نائب صدر ڈی بی سندر رامم نے اس سودے پر ردعمل کا اظہار کرتے ہوئے کہا کہ "چرچل ہندوستانی فٹبال کی تاریخ رکھنے والا ایک حقیقی اور معتبر کلب ہے۔ ہمیں خوشی ہے کہ یہ معاہدہ ہمارے کھلاڑیوں اور کوچوں کو کلب فٹبال کھیلنا جاری رکھنے کا موقع فراہم کرتا ہے۔” انہوں نے اس تبدیلی کو آسان بنانے کے لیے فٹبال فیڈریشن اور چرچل برادرس کا شکریہ ادا کیا ہے۔
مسٹر رامم نے کہا کہ ٹاٹا اسٹیل بنیادی سطح اور یوتھ لیول پر فٹبال پر اپنی توجہ جاری رکھے گی۔ نوجوان صلاحیتوں، خاص طور پر مقامی اور قبائلی برادریوں کے نوجوانوں کی شناخت کرنے اور انہیں تراشنے کی کمپنی کی ایک طویل روایت رہی ہے۔ کمپنی فٹبال فیڈریشن کے تعاون سے اپنے یوتھ سسٹم کو جدید بنائے گی اور اس کی صلاحیتوں میں سرمایہ کاری و توسیع کرے گی۔
ٹاٹا فٹبال اکیڈمی کا قیام 1987 میں جمشید پور میں ہوا تھا اس نے 300 سے زائد کیڈٹس کو تربیت دی ہے، جن میں سے 150 نے ہندوستانی قومی ٹیم کی نمائندگی کی ہے۔ ان میں مختلف عمر کے گروپوں کی قومی ٹیموں کے 26 کپتان بھی شامل ہیں۔
فٹبال کے علاوہ ٹاٹا اسٹیل تیر اندازی، ہاکی، اسپورٹ کلائمبنگ اور روئنگ جیسے کھیلوں میں عالمی سطح کی اسپورٹس اکیڈمیاں بھی چلاتی ہے۔ کمپنی عالمی سطح کی میراتھن اور شطرنج کے مقابلوں کا بھی انعقاد کرتی ہے۔