ونے کمار بنے کرناٹک کرکٹ ٹیم کے چیف کوچ

بنگلورو، 14 اگست (یو این آئی) ہندوستان کے سابق تیز گیند باز ونے کمار کو آئندہ ڈومیسٹک سیزن کے لیے کرناٹک ٹیم کا چیف کوچ مقرر کیا گیا ہے۔ جبکہ کرناٹک کے سابق بلے باز دیپک چوگلے فیلڈنگ کوچ کے طور پر ان کے سپورٹ اسٹاف کا حصہ ہوں گے۔
42 سالہ ونے یہ ذمہ داری ییرے گوڑا سے سنبھالیں گے۔ حال ہی میں مہاراجہ ٹی-20 ٹرافی میں ہبلی ٹائیگرز کی کمان سنبھالنے کے بعد، کرناٹک کے چیف کوچ کے طور پر ونے کی یہ پہلی ذمہ داری ہوگی۔ ان کے پاس فرنچائز ٹی-20 کوچنگ کا بھی اعلیٰ سطح کا تجربہ ہے، جہاں وہ یو اے ای کی آئی ایل ٹی-20 میں ’ایم آئی ایلمیریٹس‘ کے بالنگ کوچ رہ چکے ہیں۔ اس کے علاوہ 2021 میں فرسٹ کلاس اور بین الاقوامی کرکٹ سے ریٹائرمنٹ لینے کے بعد، ونے ممبئی انڈینز میں آئی پی ایل ٹیلنٹ اسکاؤٹ کا رول بھی نبھا چکے ہیں۔
ونے رنجی ٹرافی کی تاریخ میں 442 شکاروں کے ساتھ تیز گیند بازوں میں سب سے زیادہ وکٹ لینے والے بالر ہیں اور ہندوستان کے اس اہم گھریلو ٹورنامنٹ میں مجموعی طور پر پانچویں نمبر پر ہیں۔ انہوں نے اپنے کیریر میں کھیلے 139 فرسٹ کلاس میچوں میں 22.44 کی شاندار اوسط سے کل 504 وکٹ حاصل کئے۔ ہندوستان کے لیے بین الاقوامی ڈیبیو کرنے کے بعد، ونے نے 2013 سے 2015 کے دوران کرناٹک کی کپتانی کرتے ہوئے ٹیم کو مسلسل دو بار تاریخی ’ٹریبل‘ وجے ہزارے ٹرافی، رنجی ٹرافی اور ایرانی کپ جتوایا تھا۔
ہندوستان کے لیے ایک ٹیسٹ اور 31 ون ڈے کھیلنے کے علاوہ، ونے کولکاتا نائٹ رائڈرز (2014) اور ممبئی انڈینز (2015 اور 2017) کی ان ٹیموں کا بھی حصہ تھے جنہوں نے آئی پی ایل کا خطاب جیتا تھا۔ گزشتہ سیزن کی رنر اپ رہی کرناٹک کی ٹیم 11 اکتوبر کو آندھرا کے خلاف اپنے 2026-27 رنجی ٹرافی ک مہم کا آغاز کرے گی۔