پانی جمع کو روکنے میں مسلسل دوسرے سال بھی بی جے پی حکومت ناکام: کانگریس

نئی دہلی، 11اگست (یو این آئی) دہلی ریاستی کانگریس نے دارالحکومت میں پانی کے جمع ہونے کے تعلق سے بھارتیہ جنتا پارٹی (بی جے پی) حکومت پر تنقید کرتے ہوئے کہا کہ دو دن کی ریکارڈ بارش نے دہلی کے ڈرینیج سسٹم اور سرکاری انتظامات کی قلعی کھول دی ہے۔
مسٹر یادو نے الزام لگایا کہ کروڑوں روپے خرچ کرنے کے باوجود حکومت پانی جمع ہونے کو روکنے میں مسلسل دوسرے سال ناکام رہی ہے۔ وسطی، مشرقی، مغربی، شمالی بیرونی اور جنوبی دہلی سمیت کئی علاقوں میں سڑکیں اور رہائشی علاقے تالاب بن گئے ہیں، جبکہ حکومت اور ایجنسیاں محدود مقامات پر ہی پانی جمع ہونے کی شکایت ملنے کا دعویٰ کر رہی ہیں۔ انہوں نے بتایا کہ گزشتہ 10 سال میں پہلے عام آدمی پارٹی اور اب بی جے پی دہلی والوں کو پانی جمع ہونے سے نجات دلانے میں ناکام رہی ہیں۔ تقریباً 50 سال پرانے ڈرینیج سسٹم کو بدلنے کے منصوبوں اور بڑے بجٹ کی تخصیص کے باوجود زمین پر کام نہیں ہوا ہے۔
مسٹر یادو نے بی جے پی کے نئے تین نکاتی ایکشن پلان کو حکومت کے پچھلے منصوبوں کی ناکامی کو قبول کرنے والا قدم قرار دیتے ہوئے بتایا کہ ہر بارش میں دہلی ڈوبتی ہے اور اس کا خمیازہ کروڑوں لوگوں کو بھگتنا پڑتا ہے۔