سرینگر؍۱۸ جولائی
ڈویژنل کمشنر کشمیر انشُل گَرگ نے جمعہ کو ایک اعلیٰ سطحی اجلاس کی صدارت کرتے ہوئے آئندہ یومِ آزادی کی تقریبات کے سلسلے میں مختلف محکموں کی تیاریوں کا تفصیلی جائزہ لیا اور ہدایت دی کہ پیشگی منصوبہ بندی، بین المحکماتی تال میل اور وسائل کی بروقت فراہمی کو یقینی بنایا جائے تاکہ قومی تقریب کا انعقاد خوش اسلوبی سے ممکن ہو سکے۔
ڈویژنل کمشنر نے اجلاس میں سکیورٹی، لاجسٹکس، پروٹوکول، طبی اور ہنگامی خدمات، تقریب کے مقام کے انتظامات، فل ڈریس ریہرسل، تقریب کے انعقاد اور بعد از تقریب رابطہ کاری سے متعلق انتظامات کا جامع جائزہ لیا۔
بہتر انتظامات کو یقینی بنانے کے لیے انہوں نے چیف انجینئر آر اینڈ بی کو ہدایت دی کہ تقریب کے مقام پر خیموں، نشستوں، اسٹیج اور ڈائس کے مکمل انتظامات کیے جائیں اور ایل ای ڈی اسکرینیں بھی نصب کی جائیں۔
چیف انجینئر محکمہ بجلی کو بلا تعطل بجلی کی فراہمی، مناسب جنریٹر بیک اَپ اور اہم سرکاری عمارتوں کی چراغاں کا انتظام یقینی بنانے کی ہدایت دی گئی۔
چیف انجینئر جل شکتی کو تقریب کے مقام پر پینے کے صاف پانی کی وافر فراہمی اور آر او یونٹس نصب کرنے کی ہدایت دی گئی، جبکہ محکمہ فلوریکلچر کو اسٹیج کی آرائش اور بلیدان استمبھ پر پھولوں کی سجاوٹ کا ذمہ سونپا گیا۔ پولیس محکمہ کو تقریبات کے دوران ڈرون کے ذریعے پھولوں کی پتیاں نچھاور کرنے کے انتظامات کرنے کی ہدایت بھی دی گئی۔
کمشنر سری نگر میونسپل کارپوریشن کو صفائی ستھرائی، مناسب بیت الخلاء اور بارش کی صورت میں پانی کی نکاسی کے مؤثر انتظامات یقینی بنانے کی ہدایت دی گئی۔
پولیس محکمہ کو یومِ آزادی کی تقریب کے پُرامن اور منظم انعقاد کے لیے فول پروف سکیورٹی انتظامات کرنے کی ہدایت دی گئی۔
محکمہ اطلاعات کو آر اینڈ بی محکمہ اور پولیس کے اشتراک سے ہم آہنگ عوامی نشریاتی نظام (پبلک ایڈریس سسٹم) نصب کرنے اور تشہیری ہورڈنگز لگانے کی ہدایت دی گئی تاکہ تقریب کی کارروائی بلا تعطل جاری رہ سکے۔
ڈویژنل کمشنر نے محکمہ ثقافت، محکمہ یوتھ سروسز اینڈ اسپورٹس اور جموں و کشمیر اسپورٹس کونسل کو ثقافتی پروگرام اور دیگر فنّی پیشکشیں تیار کرنے کی ہدایت دی۔انہوں نے متعلقہ محکموں کو پولیس، دیگر سیکورٹی ایجنسیوں، این سی سی، اسکولوں اور کالجوں کے دستوں کی شرکت کو یقینی بنانے کی بھی ہدایت دی۔ اس کے علاوہ اسکولوں، کالجوں اور محکمہ اطلاعات کو تقریبات کے سلسلے میں کوئز مقابلوں اور ملی نغموں کے مقابلوں کے انعقاد کی ہدایت دی گئی۔
محکمہ فائر اینڈ ایمرجنسی سروسز کو فائر ٹینڈرز تعینات رکھنے اور ہنگامی صورتحال سے نمٹنے کی مکمل تیاری رکھنے کی ہدایت دی گئی، جبکہ محکمہ مہمان نوازی و پروٹوکول کو مہمانوں کے لیے ضیافت اور دیگر پروٹوکول سے متعلق تمام انتظامات مکمل کرنے کے احکامات دیے گئے۔
ڈویژنل کمشنر نے تمام ڈپٹی کمشنروں کو بھی ہدایت دی کہ وہ اپنے اپنے اضلاع میں اسی نوعیت کے جامع انتظامات کریں تاکہ کشمیر بھر میں یومِ آزادی جوش و جذبے، حب الوطنی اور وقار کے ساتھ منایا جا سکے۔
اجلاس سے خطاب کرتے ہوئے آئی جی پی کشمیر وی کے بردی نے تمام مقامات پر پرچم کشائی کی تقریبات کے دوران مقررہ پروٹوکول پر سختی سے عمل درآمد کی ضرورت پر زور دیا۔ انہوں نے افسران کو ہدایت دی کہ نوڈل افسران تعینات کیے جائیں اور شرکاء و معزز مہمانوں کو طے شدہ ضابطہ کار سے مکمل طور پر آگاہ کیا جائے تاکہ یومِ آزادی کی تقریبات منظم، باوقار اور کامیاب انداز میں منعقد ہو سکیں۔
اجلاس میں انسپکٹر جنرل آف پولیس (آئی جی پی) کشمیر وی کے بردی، تمام اضلاع کے ڈپٹی کمشنروں، سری نگر میونسپل کارپوریشن (ایس ایم سی)، محکمہ تعمیرات عامہ (آر اینڈ بی)، محکمہ بجلی (پی ڈی ڈی)، محکمہ تعلیم، ثقافت، جل شکتی، صحت، محکمہ اطلاعات، مہمان نوازی و پروٹوکول، ٹریفک پولیس، محکمہ فائر اینڈ ایمرجنسی سروسز، دوردرشن، ایس کے آئی سی سی اور دیگر متعلقہ محکموں کے سربراہان نے شرکت کی۔
۔۔۔۔۔۔۔
ڈی آئی پی آر
