ایجنسیاں
جموں/۳ جولائی
بھارتیہ جنتا پارٹی (بی جے پی) کے قومی صدر نتن نبین۶؍اور۷جولائی کو اپنے پہلے دو روزہ دورۂ جموں و کشمیر پر آئیں گے، جہاں وہ پارٹی رہنماؤں، اراکینِ اسمبلی اور دیگر عہدیداروں کے ساتھ جموں و کشمیر کی موجودہ سیاسی صورتحال پر تفصیلی تبادلۂ خیال کریں گے۔
پارٹی ذرائع کے مطابق قومی صدر۶ جولائی کو جموں پہنچیں گے اور بھارتیہ جن سنگھ (بی جے ایس) کے بانی صدر ڈاکٹر شیاما پرساد مکھرجی کی یومِ پیدائش کے موقع پر منعقد ہونے والی ایک عوامی ریلی سے خطاب کریں گے۔
ذرائع نے بتایا کہ ’’نتن نبین پارٹی رہنماؤں اور سینئر عہدیداروں کے ساتھ تفصیلی بات چیت کریں گے تاکہ جموں و کشمیر کی موجودہ سیاسی صورتحال اور پارٹی کی تنظیمی سرگرمیوں سے متعلق ان کی رائے اور فیڈ بیک حاصل کیا جا سکے۔‘‘
ذرائع کے مطابق اس دوران جموں و کشمیر میں وزیر اعظم نریندر مودی کی حکومت کی مختلف فلاحی اسکیموں اور پروگراموں پر عمل درآمد کا بھی پارٹی کارکنوں کے ساتھ جائزہ لیا جائے گا۔
پارٹی ذرائع نے مزید بتایا کہ بی جے پی کے قومی صدر اپنے دورے کے دوران ضلع ادھم پور کا بھی دورہ کریں گے۔
