دہلی میں یکم جولائی سے نافذ ہوگی نئی ای وی پالیسی: ریکھا گپتا

نئی دہلی، 29 جون (یو این آئی) دہلی کی وزیر اعلیٰ ریکھا گپتا نے پیر کو کہا کہ آلودگی پر قابو پانے، جدید ٹرانسپورٹ سسٹم اور شہریوں کو معاشی فائدہ پہنچانے کے مقصد سے ای وی پالیسی تیار کی گئی ہے۔
محترمہ گپتا نے آج کہا کہ دہلی کابینہ نے پیر کو دہلی الیکٹرک وہیکل (ای وی) پالیسی-2026 کو منظوری دے دی۔ یہ پالیسی لیفٹیننٹ گورنر کی منظوری کے بعد یکم جولائی سے نافذ کی جائے گی۔ یہ پالیسی اگلے چار سال یعنی 31 مارچ 2030 تک مؤثر رہے گی۔ انہوں نے اسے دارالحکومت کے لیے ایک تاریخی اور دور اندیش فیصلہ قرار دیا۔ انہوں نے کہا کہ برسوں سے دہلی کو ایک ایسی جامع پالیسی کی ضرورت تھی جو آلودگی پر قابو پانے، جدید ٹرانسپورٹ سسٹم اور شہریوں کو معاشی فائدہ، ان تینوں مقاصد کو ایک ساتھ پورا کر سکے۔ نئی ای وی پالیسی انہی مقاصد کو دھیان میں رکھ کر تیار کی گئی ہے۔ انہوں نے بتایا کہ دہلی حکومت اگلے چار سال میں اس پالیسی کے تحت 7,000 کروڑ روپے سے زیادہ کی براہِ راست سرمایہ کاری کرے گی۔ اس کے علاوہ چارجنگ انفراسٹرکچر، روڈ ٹیکس اور رجسٹریشن فیس میں چھوٹ سمیت مختلف مراعات کو ملا کر شہریوں کو تقریباً کل 15,000 کروڑ روپے کا فائدہ دیا جائے گا۔ ملک میں پہلی بار اتنی بڑی سرمایہ کاری اور جامع مراعات کے ساتھ کسی ریاست کے ذریعے ای وی پالیسی نافذ کی جا رہی ہے۔ اس پالیسی میں ہائبرڈ گاڑیوں کو الگ رکھا گیا ہے۔
وزیر اعلیٰ نے کہا کہ نئی پالیسی کے تحت دو پہیہ، تین پہیہ، چار پہیہ، این-1 زمرے (ساڑھے تین ٹن تک مال ڈھونے والے) کی مال بردار گاڑیاں ، این-2 (ساڑھے تین ٹن سے 12 ٹن مال ڈھونے والے) ٹرک اور گرامین سیوا گاڑیوں کو شامل کیا گیا ہے۔ حکومت نے کسی بھی زمرے میں ترغیبات کی تعداد پر کوئی حد مقرر نہیں کی ہے۔ جتنے زیادہ شہری الیکٹرک گاڑیاں خریدیں گے، حکومت اتنے ہی زیادہ لوگوں کو ترغیبات فراہم کرے گی۔
وزیر اعلیٰ نے بتایا کہ پالیسی نافذ ہونے کے پہلے سال الیکٹرک دو پہیہ گاڑی خریدنے پر 30,000 روپے تک، دوسرے سال 20,000 روپے تک اور تیسرے سال 10,000 روپے تک کی خریداری کی ترغیب دی جائے گی۔ اسی طرح الیکٹرک تین پہیہ گاڑی خریدنے پر پہلے سال 50,000 روپے تک، دوسرے سال 30,000 روپے تک اور تیسرے سال 20,000 روپے تک کی ترغیب دی جائے گی۔ وہیں، این-1 زمرے کے الیکٹرک ٹرک خریدنے پر ایک لاکھ روپے تک کی خریداری کی ترغیب دی جائے گی۔
انہوں نے کہا کہ پرانی آلودگی پھیلانے والی گاڑیوں کو ہٹانے کے لیے حکومت نے پرکشش اسکریپنگ انسیٹو بھی فراہم کیا ہے۔ اس کے تحت بی ایس-4 یا اس سے پرانی دو پہیہ گاڑی اسکریپ کرنے پر 10,000 روپے، تین پہیہ پر 25,000 روپے، چار پہیہ گاڑی پر ایک لاکھ روپے، این-1 ٹرک پر 50,000 روپے اور گرامین سیوا گاڑی پر 15,000 روپے کی ترغیب دی جائے گی۔ اس کے ساتھ ہی تمام الیکٹرک گاڑیوں کی خریداری پر روڈ ٹیکس اور رجسٹریشن فیس میں 100 فیصد کی چھوٹ دی جائے گی۔ چار پہیہ گاڑیوں کے لیے یہ چھوٹ 30 لاکھ روپے تک کی ایکس شوروم قیمت والی الیکٹرک گاڑیوں پر ہی لاگو ہوگی۔
تمام ترغیبی رقوم ڈی بی ٹی کے ذریعے براہِ راست مستفیدین کے بینک کھاتوں میں بھیجی جائیں گی۔ انہوں نے کہا کہ دہلی میں فضائی آلودگی کا بڑا حصہ تجارتی مال بردار گاڑیوں اور دو پہیہ اور تین پہیہ گاڑیوں سے ہونے والے اخراج کے سبب ہے۔ اسی وجہ سے پالیسی میں ان زمروں کو خصوصی ترجیح دی گئی ہے تاکہ آلودگی میں مؤثر کمی لائی جا سکے۔ بھاری گاڑیوں سے ہونے والی آلودگی کو کم کرنے کے لیے نوٹیفیکیشن جاری ہونے کے تین ماہ کے اندر خریدے گئے پہلے 1,000 این-2 الیکٹرک ٹرکوں کو 10 سال تک ‘نو انٹری’ کے وقت سے چھوٹ دی جائے گی۔
وزیر اعلیٰ نے کہا کہ مضبوط چارجنگ نیٹ ورک اس پالیسی کی کامیابی کی بنیاد ہوگا۔ اسی مقصد سے پالیسی کی مدت کے دوران دہلی میں 30,000 سے زیادہ ای وی چارجنگ پوائنٹس قائم کیے جائیں گے۔ وزیر اعلیٰ نے اس پالیسی کی تیاری میں اہم تعاون دینے کے لیے وزیر برائے ٹرانسپورٹ ڈاکٹر پنکج کمار سنگھ، وزیر برائے توانائی آشیش سود، وزیر برائے ماحولیات سردار منجندر سنگھ سرسا، متعلقہ محکموں کے افسران اور تمام اسٹیک ہولڈرز کا شکریہ ادا کیا۔ انہوں نے کہا کہ تمام تجاویز پر سنجیدگی سے غور کرنے کے بعد یہ پالیسی تیار کی گئی ہے۔