بنگلہ دیش اور چین کے درمیان 13 معاہدوں پر دستخط

بیجنگ، 26 جون (یو این آئی) بنگلہ دیش اور چین نے اپنے تزویراتی اور اقتصادی تعلقات کو مزید مضبوط کرتے ہوئے تعاون کے 13 معاہدوں پر دستخط کیے ہیں۔
بنگلہ دیش کے وزیر اعظم طارق رحمان نے چینی وزیر اعظم لی کی چیانگ کے ساتھ اعلیٰ سطحی بات چیت کی، جس میں تیستا منصوبے، تجارت، سرمایہ کاری اور بنیادی ڈھانچے جیسے اہم قومی امور پر بات چیت کی گئی۔
مسٹر رحمان کو ان کے چار روزہ دورے کے دوران چین میں مکمل سرکاری اعزاز سے نوازا گیا۔ توقع ہے کہ ان معاہدوں سے تجارت، سرمایہ کاری، ترقیاتی تعاون اور عوام سے عوام کے رابطوں کو تقویت ملے گی۔ وزیر اعظم کے دفتر کے ترجمان مہدی امین نے چین میں پریس بریفنگ کے دوران کہا کہ یہ دورہ سٹریٹجک مصروفیات، بنیادی ڈھانچے کی ترقی، ملازمتوں کی تخلیق اور سرمایہ کاری کے شعبوں میں تعاون کے نئے دور کا آغاز کرے گا۔
قبل ازیں چین کے آبی وسائل کے وزیر لی گوئنگ نے وزیراعظم سے ملاقات کی اور تیستا ماسٹر پلان کے ساتھ ساتھ دریا کے انتظام، سیلاب پر قابو پانے، ڈریجنگ اور آبپاشی پر تعاون بڑھانے پر اتفاق کیا۔ چین نے آبی وسائل کے انتظام میں تحقیق اور تکنیکی تربیت کے ذریعے بنگلہ دیش کی مدد کرنے میں بھی دلچسپی ظاہر کی ہے۔ سیاسی سطح پر، بی این پی کے چیئرمین رحمان نے چین کی کمیونسٹ پارٹی کے بین الاقوامی محکمہ کے وزیر لیو ہائیکسنگ سے ملاقات کی۔ انہوں نے دونوں جماعتوں کے درمیان طویل مدتی تعاون کو بڑھانے پر اتفاق کیا اور مفاہمت کی ایک یادداشت پر دستخط کئے۔
مسٹر رحمان جمعہ کو چینی صدر شی جن پنگ اور نیشنل پیپلز کانگریس کی سٹینڈنگ کمیٹی کے چیئرمین ژاؤ لیجی سے ملاقات کریں گے۔ اس کے بعد وہ اپنا پہلا غیر ملکی دورہ مکمل کرکے شام کو ڈھاکہ واپس پہنچیں گے۔