بینکم چندر چٹوپادھیائے کی یومِ پیدائش پر خراجِ عقیدت:شاہ
ایجنسیاں
نئی دہلی؍۲۶ جون
مرکزی وزیر داخلہ امت شاہ نے جمعہ کے روز کہا کہ ’وندے ماترم‘ صرف ایک حب الوطنی کا نغمہ نہیں بلکہ ’ہندوستان کی تعمیرِ نو کا منتر‘ ہے۔
انہوں نے یہ بات بینکم چندر چٹوپادھیائے کی یومِ پیدائش پر انہیں خراجِ عقیدت پیش کرتے ہوئے ملک کی انسدادِ منشیات حکمت عملی سے متعلق ایک اعلیٰ سطحی اجلاس سے خطاب کے دوران کہی۔
نارکو کوآرڈی نیشن سینٹر (این سی او آر ڈی) کے دسویں اعلیٰ سطحی اجلاس سے خطاب کرتے ہوئے امت شاہ نے کہا کہ۲۶ جون ملک کی منشیات مخالف مہم کے لیے ایک اہم دن ہے۔
شاہ نے کہا کہ آج ہی کے دن عظیم ادیب بینکم چندر چٹوپادھیائے کی یومِ پیدائش بھی منائی جاتی ہے، جنہوں نے برطانوی دورِ حکومت میں قوم کے اندر خود اعتمادی اور قومی شعور بیدار کرنے میں اہم کردار ادا کیا۔
وزیر داخلہ نے کہا’ بینکم بابو نے وندے ماترم کی تخلیق کیا۔ وندے ماترم قوم کے ثقافتی شعور اور حب الوطنی کی ایک مضبوط علامت بن گیا۔ جب تحریکِ آزادی اپنے عروج پر پہنچی تو انگریزوں کے خلاف جدوجہد کا سب سے بڑا نعرہ وندے ماترم تھا‘‘۔
آزادی کے مجاہدین کی قربانیوں کو یاد کرتے ہوئے شاہ نے کہا کہ متعدد انقلابیوں نے ’وندے ماترم‘ کا نعرہ لگاتے ہوئے پھانسی کے پھندے کو گلے لگایا۔
وزیر داخلہ نے کہا’وندے ماترم‘ ہم تمام ہندوستانیوں کے لیے صرف ایک نعرہ یا گیت نہیں ہے۔ یہ محض ایسا نغمہ بھی نہیں جس نے تحریکِ آزادی کا تعارف کرایا ہو۔ وندے ماترم ہندوستان کی تعمیرِ نو کا ایک منتر ہے اور مادرِ وطن کو دنیا میں بلند ترین مقام پر دوبارہ فائز کرنے کا ذریعہ بھی ہے۔
اس اجلاس میں۴۴ مرکزی وزارتوں اور محکموں، مختلف ریاستی حکومتوں اور منشیات سے متعلق قانون نافذ کرنے والی ایجنسیوں کے نمائندوں نے ہائبرڈ طرز پر شرکت کی۔ اجلاس میں منشیات سے پاک ہندوستان کے ہدف کے حصول کے لیے حکومت کی کوششوں کو مزید مضبوط بنانے پر غور کیا گیا۔
اجلاس کے دوران مصنوعی منشیات کے بڑھتے ہوئے خطرے سے نمٹنے، ڈارک نیٹ کے ذریعے ہونے والی اسمگلنگ پر قابو پانے اور آئندہ تین برسوں کے دوران منشیات کے عادی افراد کی بحالی کے مراکز کے دائرۂ کار کو وسیع کرنے سے متعلق امور پر بھی تفصیلی تبادلۂ خیال کیا گیا
