ایجنسیاں
سرینگر؍۲۵ جون
جموں و کشمیر حکومت نے جمعرات کو تقریباً ایک ماہ کی بندش کے بعد گلمرگ کیبل کار منصوبہ (گنڈولا) دوبارہ عوام کے لیے کھول دیا۔ گزشتہ ماہ فنی خرابی پیدا ہونے کے باعث اس مقبول سیاحتی سروس کو عارضی طور پر بند کر دیا گیا تھا۔
کیبل کار کارپوریشن کے ایک عہدیدار نے بتایا ’’ضروری مرمت اور دیکھ بھال کا عمل مکمل ہونے کے بعد آج سے گنڈولا سروس دوبارہ بحال کر دی گئی ہے‘‘۔
انہوں نے کہا کہ گزشتہ چند روز کے دوران منصوبے پر متعدد تکنیکی جانچیں کی گئیں تاکہ اس بات کو یقینی بنایا جا سکے کہ نظام میں کسی قسم کی خرابی باقی نہ رہے۔ ان کے مطابق سیاح اب کارپوریشن کے سرکاری پورٹل کے ذریعے گنڈولا کی سواری کے لیے بکنگ کرا سکتے ہیں۔
قابلِ ذکر ہے کہ۲۵ مئی کو گلمرگ گنڈولا سروس میں فنی خرابی پیدا ہونے کے بعد فوج، پولیس، این ڈی آر ایف اور ایس ڈی آر ایف نے مشترکہ طور پر ریسکیو آپریشن شروع کیا تھا۔ اس واقعے میں۳۰۰سے زائد سیاح اور مقامی گائیڈ فضا میں معلق رہ گئے تھے، جنہیں بعد ازاں بحفاظت نکال لیا گیا تھا۔
اس واقعے کے بعد جموں و کشمیر حکومت نے۱۰ جون کو ایک پانچ رکنی تحقیقاتی کمیٹی تشکیل دی تھی، جسے گلمرگ کیبل کار سروس میں خرابی کی وجوہات کی جانچ کر کے۱۰ دن کے اندر اپنی رپورٹ پیش کرنے کی ہدایت دی گئی تھی۔
