اے بی وی پی کے وفد نے رادھا کرشنن سے کی ملاقات، طلبہ کے مفادات کے سلسلے میں کی گفتگو

نئی دہلی، 24 جون (یو این آئی) اکھل بھارتیہ ودیارتھی پریشد (اے بی وی پی ) کے قومی صدر پروفیسر رگھوراج کشور تیواری اور قومی جنرل سکریٹری ڈاکٹر ویریندر سنگھ سولنکی کی قیادت میں ایک وفد نے بدھ کو نائب صدر جمہوریہ سی پی رادھا کرشنن سے خیر سگالی ملاقات کی اور ان سے اے بی وی پی کی تنظیمی توسیع، طلبہ کے مفادات کے لیے چلائی جا رہی تحریکوں اور مختلف شعبوں میں طلبہ کی تعمیری شراکت داری پر تفصیل سے گفتگو کی۔
یہ پہلی بار ہے، جب مسٹر رادھا کرشنن کے نائب صدر جمہوریہ کا عہدہ سنبھالنے کے بعد اے بی وی پی کے کسی وفد نے ان سے ملاقات کی ہے۔ اس دوران وفد نے نائب صدر جمہوریہ سے پنجاب یونیورسٹی کی گورننگ کونسل میں طلبہ کی نمائندگی، ہاسٹل کی توسیع اور خالی پڑے تعلیمی عہدوں پر شفاف تقرری کے عمل کے تعلق سے بات چیت کی۔ ملاقات کے دوران وفد میں شامل ارکان نے ملک کی تعمیر نو میں نوجوانوں کی طاقت کے کردار، اعلیٰ تعلیم سے جڑے عصری موضوعات اور اے بی وی پی کی جانب سے ملک بھر میں چلائی جانے والی مختلف پہل اور مہمات پر تبادلہ خیال کیا۔
اے بی وی پی کی طرف سے جاری کردہ ریلیز کے مطابق گفتگو کے دوران وفد نے اے بی وی پی کی تنظیمی توسیع، طلبہ کے مفادات کے لیے چلائی جا رہی تحریکوں اور قومی زندگی کے مختلف شعبوں میں طلبہ کی تعمیری شراکت داری پر تفصیل سے تبادلہ خیال کیا۔ وفد نے نائب صدر جمہوریہ کو بتایا کہ ودیارتھی پریشد کے زیر اہتمام چلنے والا ‘دوسری ریاست میں رہنے کا طلبہ کا تجربہ’ (ایس ای آئی ایل) پروگرام اپنے 60 سال مکمل کر رہا ہے۔ چھ دہائیوں سے جاری یہ مہم ملک کے مختلف خطوں بالخصوص شمال مشرق کے طلبہ کے درمیان جذباتی یکجہتی، ثقافتی مکالمے اور قومی ہم آہنگی کو مضبوط کرنے کا ایک اہم ذریعہ رہی ہے۔ وفد نے نوجوانوں میں بڑھتے ہوئے ڈیجیٹل انحصار کے چیلنج کا ذکر کرتے ہوئے اے بی وی پی کی ‘اسکرین ٹائم ٹو ایکٹیویٹی ٹائم’ مہم کی معلومات بھی شیئر کی۔ مہم کا مقصد طلبہ کو موبائل اور اسکرین پر مبنی طرز زندگی سے باہر نکال کر کھیل، جسمانی سرگرمیوں، سماجی ذمہ داریوں اور تعمیری شراکت داری کی طرف راغب کرنا ہے۔ اس دوران آنے والے وقت میں منعقد ہونے والی مختلف قومی مہمات اور پروگراموں کی تفصیلات بھی شیئر کی گئیں۔
وفد نے گرو تیغ بہادر جی کے 350 ویں یوم شہادت، سنت رویداس جی کے 650 ویں پرکٹ اتسو سال اور بیراگنا رانی ابکا کی منفرد شراکت پر مرکوز ملک گیر پروگراموں کا خاکہ شیئر کیا۔ ساتھ ہی، خواتین کے تحفظ اور تفویض اختیارات کے شعبے میں اے بی وی پی کی اہم مہم ‘مشن ساہسی’ کے تحت اب تک 10 لاکھ سے زیادہ طالبات کو سیلف ڈیفنس کی ٹریننگ فراہم کیے جانے کی معلومات دیتے ہوئے اس کے اگلے مرحلے کو دوبارہ ملک گیر سطح پر شروع کرنے کے منصوبے سے آگاہ کیا گیا۔