یو ٹی عوام کے امن، خوشحالی اور فلاح و بہبود کیلئے خصوصی دعائیں
ڈی آئی پی آر
گاندربل؍۲۲ جون
لیفٹیننٹ گورنر منوج سنہا نے آج زیستھ اشٹمی کے مقدس موقع پر ضلع گاندربل کے تلہ مولہ میں واقع تاریخی اور مقدس ماتا کھیر بھوانی مندر میں حاضری دی اور جموں و کشمیر کے عوام کے امن، خوشحالی اور فلاح و بہبود کے لیے خصوصی دعائیں مانگیں۔
لیفٹیننٹ گورنر نے اس موقع پر عقیدت مندوں کو مبارکباد پیش کرتے ہوئے دعا کی کہ ماتا رگنیا دیوی کی برکتیں سب پر قائم رہیں اور وہ ہم آہنگی، ترقی اور روحانی سکون کی راہ پر گامزن رہیں۔
کشمیری پنڈت برادری کے ارکان سے بات چیت کرتے ہوئے منوج سنہا نے یقین دلایا کہ زائرین کے لیے تمام ضروری اور جامع انتظامات کامیابی کے ساتھ مکمل کیے گئے ہیں تاکہ ہر عقیدت مند کو ایک پُرسکون، محفوظ اور روحانی ماحول میسر آ سکے۔
سنہا نے مقامی انتظامیہ کی فعال کوششوں کو سراہتے ہوئے کہا کہ انتظامیہ ملک بھر سے آنے والے بڑھتے ہوئے عقیدت مندوں کی سہولت کے لیے بنیادی ڈھانچے اور معاون خدمات کو مزید بہتر بنانے کے لیے پوری طرح پرعزم ہے۔
لیفٹیننٹ گورنر نے سالانہ میلے کے کامیاب انعقاد کے لیے تمام متعلقہ اداروں اور فریقین کی باہمی ہم آہنگی اور مؤثر انتظامات کی بھی تعریف کی۔
اس موقع پر انہوں نے مختلف کشمیری پنڈت تنظیموں کے نمائندوں، وزیر اعظم پیکیج ملازمین اور سول سوسائٹی وفود سے بھی ملاقات کی۔ انہوں نے ان کے مسائل اور مطالبات کو بغور سنا اور یقین دلایا کہ انتظامیہ ان کی فلاح و بہبود اور مسائل کے حل کے لیے پوری سنجیدگی سے کام کر رہی ہے۔
میڈیا نمائندوں سے گفتگو کرتے ہوئے لیفٹیننٹ گورنر نے کہا’’آج میں نے سب کے امن، خوشحالی اور فلاح و بہبود کے لیے دعا کی ہے۔ ماتا کھیر بھوانی کی برکتیں سب پر نازل ہوں۔ اس سال مقدس مقام پر آنے والے عقیدت مندوں کی تعداد گزشتہ برسوں کے مقابلے میں زیادہ ہے۔ انتظامیہ نے زائرین کی سہولت، سلامتی اور یاترا کے پُرامن انعقاد کو یقینی بنانے کے لیے جامع اور فول پروف انتظامات کیے ہیں۔‘‘
اس موقع پر چیف سیکریٹری اتل ڈلو، ڈائریکٹر جنرل آف پولیس نلین پربھات، ڈویژنل کمشنر کشمیر انشول گرگ، ڈپٹی کمشنر گاندربل جاتن کشور، ریلیف و بحالی کمشنر ڈاکٹر اروند کروانی، پولیس اور سول انتظامیہ کے سینئر افسران اور مختلف کشمیری پنڈت تنظیموں کے سربراہان بھی موجود تھے۔
