پیرس میں بڑی کمپنیوں کے عہدیداروں سے ملے مودی، ہندوستان کے ساتھ مل کر کام کرنے کی اپیل کی

نئی دہلی، 18 جون (یو این آئی) وزیر اعظم نریندر مودی نے جمعرات کو پیرس میں مسٹرل اے آئی، السٹوم اور سینٹ گوبین جیسی کئی بڑی کمپنیوں کے عہدیداروں سے الگ الگ ملاقات کی اور انہیں خاص طور پر مصنوعی ذہانت (اے آئی) کے شعبے میں ہندوستانی نوجوانوں کے ساتھ مل کر کام کرنے کی دعوت دی۔ ملاقات کے بعد مسٹر مودی نے سوشل میڈیا پر سلسلہ وار پوسٹ میں ان کے ساتھ ہوئی بات چیت شیئر کی۔
مسٹرل اے آئی کے شریک بانی آرتھر مینش کے ساتھ ملاقات کے بعد انہوں نے کہا کہ بدلتے ہوئے عالمی منظر نامے پر بامعنی بات چیت ہوئی۔ انہوں نے قابل بھروسہ اے آئی، اختراع اور یہ یقینی بنانے کی ضرورت پر خیالات کا تبادلہ کیا کہ اے آئی انسانیت پر مرکوز اور جامع بنے۔ انہوں نے کہا، "اے آئی سے جڑے مختلف پہلوؤں میں ہندوستان میں پارٹنرشپ کے امکانات پر بات ہوئی۔ ہندوستان ایسے اے آئی سلوشنز تیار کرنے کے لیے پرعزم ہے جو اختراع، بھروسے اور بین الاقوامی تعاون کو فروغ دیتے ہوئے انسانیت کو بااختیار بنائیں۔”
السٹوم کے چیف ایگزیکٹو آفیسر مسٹر مارٹن سیان کے ساتھ گفتگو کے بعد مسٹر مودی نے کہا کہ ہندوستان میں السٹوم کی پہلے سے ہی مضبوط موجودگی ہے۔ ہندوستان کی ترقی کی کہانی میں ان کا بھروسہ اورمیک ان انڈیاو میک فار دی ورلڈ کی سمت میں ان کی کوششیں تعریف کے قابل ہیں۔ انہوں نے یقین ظاہر کیا کہ آنے والے وقت میں یہ مواقع اور بھی بہتر ہونے والے ہیں۔ انہوں نے کہا کہ وہ دنیا کو ہندوستانی نوجوانوں کے ساتھ مل کر کام کرنے کے لیے مدعو کرتے ہیں۔
مسٹر مودی نے سینٹ-گوبین کمپنی کے چیف ایگزیکٹو آفیسر بینوئٹ بازن کے ساتھ بات چیت میں کہا کہ ہندوستان انفراسٹرکچر اور شہری ترقی میں غیر معمولی تبدیلی سے گزر رہا ہے۔ انہوں نے کہا، "ہندوستان میں سینٹ-گوبین کی موجودگی کو مزید بڑھانے اور اختراع، سرکولر معیشت نیز دیگر شعبوں میں شراکت داری کے طریقوں پر بحث ہوئی۔ ہندوستان کا تنوع اور بڑے پیمانے کا مآخذ ‘گلوبل ساؤتھ’ کے لیے حل تیار کرنے کا ایک مثالی پلیٹ فارم فراہم کرتا ہے۔” وزیر اعظم نے ٹرانسپورٹ سیکٹر کی کمپنی سی ایم اے سی جی ایم کے چیف ایگزیکٹو آفیسر روڈولف ساڈے کے ساتھ سمندری رابطے، عالمی جہاز رانی کے رجحانات اور ہندوستان کے تیزی سے بڑھتے ہوئے سمندری شعبے میں ابھرتے ہوئے مواقع پر بامعنی گفتگو کی۔ انہوں نے کہا، "جہاز سازی، کنٹینر کی تعمیر، ڈیجیٹل سمندری اختراع، لاجسٹکس اور مہارت کی ترقی میں بہتر تعاون کے راستوں پر بحث ہوئی۔ ہندوستان میں بڑھتا ہوا بندرگاہوں کا انفراسٹرکچر عالمی سمندری کمپنیوں کے لیے شاندار مواقع فراہم کرتا ہے۔”
وزیر اعظم جی-7 سربراہ اجلاس میں حصہ لینے کے لیے فرانس کے دورے پر ہیں۔ وزیر اعظم نے سربراہ اجلاس کے اختتام کے بعد ان کمپنیوں کے عہدیداروں کے ساتھ میٹنگ کی۔