مودی نے یورپی کونسل کے صدر کوسٹا اور یورپی کمیشن کی صدر وان ڈیر لیین کے ساتھ دوطرفہ میٹنگیں کیں

نئی دہلی، 17 جون (یو این آئی) وزیر اعظم نریندر مودی نے بدھ کو فرانس کے شہر ایویاں میں جی-7 سربراہ اجلاس کے دوران یورپی کونسل کے صدر انتونیو کوسٹا اور یورپی کمیشن کی صدر ارسلا وان ڈیر لیین کے ساتھ دوطرفہ میٹنگیں کیں۔
وزارت خارجہ نے بتایا کہ اس سال جنوری میں ہندوستان میں تاریخی 16 ویں ہندوستان-یورپی یونین سربراہ اجلاس کو یاد کرتے ہوئے رہنماؤں نے ہندوستان-یورپی یونین کے دوطرفہ تعلقات میں نمایاں پیش رفت کا خیرمقدم کیا۔ انہوں نے ہندوستان-یورپی یونین آزاد تجارتی معاہدہ (ایف ٹی اے) مذاکرات کو حتمی شکل دیے جانے کو ایک تاریخی کامیابی قرار دیا اور اس پر جلد دستخط کرنے اور نافذ کرنے پر زور دیا۔ اس سے تجارت اور سرمایہ کاری کے لیے بڑے مواقع کھلیں گے نیز موجودہ غیر مستحکم جیو پولیٹیکل ماحول میں سپلائی چینز میں تنوع لانے میں مدد ملے گی۔ دنیا کی دو سب سے بڑی جمہوریتوں کے طور پر جن کی معیشتیں کھلی مارکیٹ والی ہیں اور معاشرہ متنوع ہے، ہندوستان اور یورپی یونین کے درمیان تعلقات اعتماد، مشترکہ اقدار اور مستقبل کے لیے ایک جیسے نقطہ نظر پر مبنی ہیں۔ رہنماؤں نے اس سال جنوری میں منظور کیے گئے مشترکہ ہندوستان-یورپی یونین جامع اسٹریٹجک ایجنڈے پر ہوئی پیش رفت پر تبادلہ خیال کیا اور اس بات پر اتفاق کیا کہ اس سے ہندوستان-یورپی یونین کی اسٹریٹجک شراکت داری اور مضبوط ہوگی نیز دونوں فریقوں کے لیے فائدہ مند اور انقلابی نتائج سامنے آئیں گے۔
باہمی دلچسپی کے علاقائی اور عالمی امور پر خیالات کا تبادلہ کرتے ہوئے انہوں نے مغربی ایشیا کے حالات کا خیرمقدم کیا۔ انہوں نے ایک مضبوط کثیر قطبی عالمی نظام کو تشکیل دینے کے اپنے مشترکہ عزم کو دہرایا، جو امن و استحکام، خوشحالی اور پائیدار ترقی میں تعاون دے۔