نیٹ دوبارہ امتحان کے لیے ریاستی حکومتوں کی تیاریوں کا مرکزی داخلہ سکریٹری نے جائزہ لیا

نئی دہلی، 16 جون (یواین آئی) مرکزی داخلہ سکریٹری گووند موہن نے پیر کے روز سال 2026 کے نیٹ (انڈر گریجویٹ) دوبارہ امتحان کے لیے ریاستی حکومتوں کی تیاریوں کا جائزہ لیا، جس میں طلبہ کی سہولت، سکیورٹی انتظامات اور امتحانی عمل کی شفافیت اور سالمیت پر خصوصی توجہ دی گئی۔
وزارت داخلہ کے مطابق جائزہ اجلاس میں ریلوے بورڈ کے چیئرمین، محکمہ اسکولی تعلیم و خواندگی کے سکریٹری، محکمہ اعلیٰ تعلیم کے سکریٹری، محکمہ ڈاک کے سکریٹری، مرکزی ریزرو پولیس فورس، مرکزی صنعتی سلامتی فورس، بیورو آف سول ایوی ایشن سکیورٹی کے ڈائریکٹر جنرل اور نیشنل ٹیسٹنگ ایجنسی کے ڈائریکٹر جنرل نیز وزارت دفاع اور وزارت صحت و خاندانی بہبود کے سینئر حکام نے شرکت کی۔
مرکزی داخلہ سکریٹری نے تمام ریاستی حکومتوں، مرکز کے زیر انتظام علاقوں اور مرکزی ایجنسیوں کو ہدایت دی کہ سکیورٹی پروٹوکول پر سختی سے عمل درآمد یقینی بنایا جائے اور امتحان کا انعقاد کسی بھی خامی کے بغیر کیا جائے۔ ریاستوں اور مرکز کے زیر انتظام علاقوں سے طلبہ کے لیے آسان اور ہموار سفر کو یقینی بنانے کی بھی درخواست کی گئی۔ ریلوے بورڈ کے چیئرمین نے مکمل تعاون کا یقین دلایا۔
نیٹ (انڈر گریجویٹ) کا دوبارہ امتحان ملک بھر میں 21 جون کو منعقد کیا جائے گا۔