محکمہ دیہی ترقی کااسسٹنٹ انجینئر رشوت لیتے ہوئے گرفتار :اے سی بی

سرینگر//
جموںکشمیر اینٹی کرپشن بیورو (اے سی بی ) نے رولر ڈولپمنٹ ڈپارٹمنٹ سب ڈویڑن اونتی پورہ میں تعینات اسسٹنٹ انجینئر کو دو ہزار روپے کی رشوت لیتے ہوئے رنگے ہاتھوں دھر دبوچ کر سلاخوں کے پیچھے دھکیل دیا۔
اے سی بی کے ایک ترجمان نے بتایا کہ ایک شخص نے بیورو میں شکایت درج کی کہ سی ڈی آر کی رقم ریلیز کرنے کی خاطر اسسٹنٹ انجینئر مشتاق احمد نجار دو ہزار روپے کی رشوت طلب کر رہا ہے۔
شکایت ملتے ہی اے سی بی نے اس ضمن میں ایف آئی آر زیر نمبر۱۳کے تحت کیس درج کرکے تحقیقات شروع کی۔
ترجمان نے مزید بتایا کہ رشوت خور انجینئر کو پکڑنے کی خاطر اینٹی کرپشن بیورو نے ایک جال بچھایا جس دوران اسسٹنٹ انجینئر کو شکایت کنندہ سے دو ہزار روپے کی رشوت لیتے ہوئے رنگے ہاتھوں گرفتار کیا گیا۔
ترجمان نے بتایا کہ آزاد گواہوں کی موجودگی میں اسسٹنٹ انجینئر سے دو ہزار روپے کی رقم برآمد کرکے ضبط کی گئی۔اْن کے مطابق اس سلسلے میں مزید تحقیقات جاری ہے۔