سرینگر؍۱۸مئی
جموں و کشمیر کرائم برانچ کے اکنامک آفنسز وِنگ (ای او ڈبلیو) نے جموں و کشمیر اسٹیٹ پاور ڈیولپمنٹ کارپوریشن کے سابق اِنچارج سپرنٹنڈنگ انجینئر کے خلاف مبینہ جعلسازی اور سرکاری ریکارڈ تلف کرنے کے معاملے میں چارج شیٹ دائر کر دی ہے۔
حکام کے مطابق یہ چارج شیٹ چیف جوڈیشل مجسٹریٹ سری نگر کی عدالت میں ایک ایف آئی آرکے تحت پیش کی گئی، جو تعزیراتِ رنبیر کی دفعات۴۲۰‘۴۶۷’۱۶۸‘۴۷۱؍اور۲۰۱کے تحت درج کی گئی تھی۔
یہ مقدمہ ایک تحریری شکایت کے بعد درج کیا گیا تھا، جس میں اُس وقت کے اِنچارج سپرنٹنڈنگ انجینئر کے سروس ریکارڈ میں تاریخِ پیدائش میں رد و بدل کرنے کا الزام عائد کیا گیا تھا۔
تحقیقات، جو اُس وقت پولیس اسٹیشن کرائم برانچ کشمیر اور موجودہ اکنامک آفنسز وِنگ کشمیر نے انجام دیں، کے دوران یہ بات سامنے آئی کہ ملزم نے مبینہ طور پر غیر قانونی سروس فوائد حاصل کرنے کے لیے سرکاری ریکارڈ میں اپنی تاریخِ پیدائش۲۸؍اکتوبر۱۹۵۵سے تبدیل کر کے۲۸؍اکتوبر۱۹۵۸درج کرائی تھی۔
