پیٹرول، ڈیزیل اور سی این جی کی قیمتوں میں اضافہ، روزمرہ کی اشیاء مہنگی ہونے کا خدشہ

نئی دہلی، 15 مئی (یو این آئی) تیل کی مارکیٹنگ کمپنیوں نے جمعہ کے روز پیٹرول اور ڈیزیل کی قیمتوں میں اضافہ کر دیا۔ اس کے ساتھ ہی قومی دارالحکومت دہلی اور آس پاس کے شہروں میں سی این جی بھی مہنگی ہو گئی ہے۔
ملک کی سب سے بڑی تیل مارکیٹنگ کمپنی انڈین آئل کارپوریشن سے حاصل کردہ معلومات کے مطابق، قومی دارالحکومت دہلی میں آج سے غیر برانڈڈ ڈیزیل کی قیمت 90.67 روپے فی لیٹر ہو گئی ہے، جو پہلے 87.67 روپے تھی۔ اسی طرح، ایک لیٹر پیٹرول کی قیمت میں تین روپے کا اضافہ کر کے اسے 97.77 روپے کر دیا گیا ہے۔ گزشتہ ڈیڑھ سال میں یہ پہلا موقع ہے جب پیٹرول اور ڈیزیل کے نرخ بڑھائے گئے ہیں۔ اس سے قبل 30 اکتوبر 2024 کو دونوں ایندھنوں کی قیمتوں میں اضافہ کیا گیا تھا۔
دہلی اور آس پاس کے علاقوں میں گیس سپلائی کرنے والی کمپنی ‘اندر پرستھ گیس لمیٹڈ’ نے بھی آج سے سی این جی کی قیمت میں دو روپے فی کلوگرام اضافے کا اعلان کیا ہے۔ دہلی میں اب ایک کلو سی این جی 79.09 روپے کی ہو گئی ہے، جبکہ پہلے یہ 77.09 روپے تھی۔ آئی جی ایل نے دہلی کے ساتھ ساتھ نوئیڈا، غازی آباد، میرٹھ، گروگرام، کانپور اور اجمیر سمیت کئی دیگر شہروں میں بھی قیمتوں میں دو روپے کا اضافہ کیا ہے۔ اس سے قبل یکم اپریل کو آئی جی ایل نے پی این جی کی قیمتوں میں بھی 1.70 روپے فی اسٹینڈرڈ کیوبک میٹر کا اضافہ کیا تھا۔
مغربی ایشیا کے بحران کے باعث عالمی منڈی میں خام تیل کی قیمتیں بڑھنے سے کمپنیوں پر قیمتوں میں اضافے کا دباؤ تھا۔ اگرچہ مرکزی حکومت نے پیٹرول اور ڈیزیل پر ایکسائز ڈیوٹی میں 10، 10 روپے فی لیٹر کی کٹوتی کر کے کمپنیوں کو راحت دی تھی۔ انڈین آئل نے دہلی میں اپنے برانڈڈ (پریمیم) پیٹرول ‘ایکس پی 95’ کی قیمت 2.99 روپے بڑھا کر 104.88 روپے فی لیٹر اور برانڈڈ ڈیزیل ‘ایکس جی’ کی قیمت تین روپے بڑھا کر 95.95 روپے فی لیٹر کر دی ہے۔ فروری میں مغربی ایشیا کا بحران شروع ہونے کے بعد برانڈڈ ڈیزیل کی قیمتوں میں یہ دوسرا اضافہ ہے۔
دیگر شہروں میں بھی قیمتوں میں اسی طرح کا اضافہ دیکھا گیا ہے، تاہم ویٹ اور لاجسٹک اخراجات کی وجہ سے شرح میں معمولی فرق ہے۔ ممبئی میں پیٹرول 3.14 روپے مہنگا ہو کر 106.68 روپے فی لیٹر پر پہنچ گیا ہے، جبکہ ڈیزیل کی قیمت 3.11 روپے اضافے کے ساتھ 93.14 روپے ہو گئی ہے۔ کولکتہ میں پیٹرول 108.74 روپے اور چنئی میں 103.67 روپے فی لیٹر ہو گیا ہے۔ اسی طرح ڈیزیل کی قیمت کولکتہ میں 95.13 روپے اور چنئی میں 95.25 روپے فی لیٹر تک پہنچ گئی ہے۔