روس اور یوکرین کے درمیان ڈرون و میزائل حملوں میں شدت

روس اور یوکرین کے درمیان ڈرون و میزائل حملوں میں شدت
ماسکو ، 15 مئی (یواین آئی) — روس اور یوکرین کے درمیان جنگ میں شدت آ گئی ہے، جبکہ دونوں ممالک نے ایک دوسرے کے خلاف ڈرون اور میزائل حملوں میں نمایاں اضافہ کر دیا ہے۔روسی وزارتِ دفاع کے مطابق گزشتہ رات 355 یوکرینی ڈرونز کو مار گرایا گیا۔
روسی حکام نے بتایا کہ یوکرینی ڈرون حملے میں روسی شہر ریازان میں تین افراد ہلاک جبکہ بچوں سمیت 12 زخمی ہو گئے۔
حکام کے مطابق حملوں سے رہائشی عمارتوں اور ایک کارخانے کو بھی نقصان پہنچا۔
دوسری جانب کیف پر روس کے بڑے میزائل اور ڈرون حملوں میں تین بچوں سمیت 24 افراد ہلاک جبکہ 47 زخمی ہو گئے۔
یوکرینی فضائیہ کے مطابق روس نے 675 ڈرونز اور 56 میزائل داغے، جن میں سے بیشتر کا ہدف کیف تھا۔
یوکرینی صدر ولودی میر زیلنسکی نے کہا کہ روسی حملوں میں رہائشی عمارتوں، اسکول، ویٹرنری کلینک اور دیگر شہری تنصیبات کو نقصان پہنچا ہے۔
رپورٹس کے مطابق حالیہ حملوں نے جنگ کو ایک نئے خطرناک مرحلے میں داخل کر دیا ہے، جبکہ دونوں ممالک ایک دوسرے کے اہم شہری اور عسکری اہداف کو مسلسل نشانہ بنا رہے ہیں۔