ویمنز ٹی ٹونٹی ورلڈ کپ کے لئے آسٹریلیائی ٹیم کا اعلان، نوجوان لوسی ہیملٹن پہلی بار شامل

ملبورن ، 13 مئی(یو این آئی ) کرکٹ آسٹریلیا (سی اے)نے آئی سی سی ویمنز ٹی ٹوئنٹی ورلڈ کپ 2026کے لئے اپنے 15رکنی سکواڈ کا اعلان کر دیا ہے۔ آسٹریلیائی ٹیم کی قیادت سوفی مولینیکس کریں گی جبکہ نوجوان فاسٹ بولر لوسی ہیملٹن پہلی بار ورلڈ کپ اسکواڈ میں جگہ بنانے میں کامیاب رہی ہیں۔ تجربہ کار گریس ہیرس کی بھی ٹیم میں واپسی ہوئی ہے، تاہم سٹار فاسٹ بولر ڈارسی براؤن اپنی جگہ برقرار نہ رکھ سکیں۔
قومی سلیکٹر شان فلیگلر کے مطابق 20 سالہ لوسی ہیملٹن کو ان کی بائیں ہاتھ سے تیز گیند بازی کی منفرد مہارت کی وجہ سے ترجیح دی گئی ہے۔ اسکواڈ میں ایلیس پیری اپنے دسویں ورلڈ کپ کے لئے تیار ہیں، جبکہ ایش گارڈنر اور تہلیا میک گرا کو نائب کپتانی کی ذمہ داریاں سونپی گئی ہیں۔
آسٹریلیائی ٹیم تجربہ کار اور نوجوان کھلاڑیوں کے بہترین توازن کے ساتھ اپنے اعزاز کا دفاع کرنے کے لئے پرعزم ہے۔ آئی سی سی ویمنز ٹی ٹوئنٹی ورلڈ کپ 2026کے لئے آسٹریلیائی اعلان کردہ ویمنز 15 رکنی اسکواڈ میں سوفی مولینیکس (کپتان)، ایشلے گارڈنر (نائب کپتان)، تہلیا میک گرا (نائب کپتان)، ایلیس پیری، نکولا کیری، کم گارتھ، لوسی ہیملٹن، الانا کنگ، گریس ہیرس، فوبی لچ فیلڈ، جارجیا وول، بیتھ مونی، میگن شٹ، اینابیل سدرلینڈ اور جارجیا ویرہیم شامل ہیں۔(ریزرو کھلاڑی ، تہلیا ولسن ہیں)