ایجنسیز
سرینگر؍۱۲مئی
’نشہ مکت جموں و کشمیر ابھیان‘کے تحت جاری مہم کے دوران سرینگر پولیس نے پیر کے روز ایک بڑی کارروائی کرتے ہوئے حضرتبل کے گاسو علاقے میں مبینہ منشیات فروش کی تقریباً۱ء۲کروڑ روپے مالیت کی رہائشی جائیداد ضبط کر لی۔
حکام کے مطابق ضبط کی گئی جائیداد میں ایک دو منزلہ رہائشی مکان اور زمین شامل ہے، جو مقصود حسین خان ولد عبدالمجید خان ساکن بانڈے لین حضرتبل اور حال مقیم گاسو حضرتبل کی ملکیت ہے۔
پولیس نے بتایا کہ یہ کارروائی پولیس اسٹیشن نگین نے این ڈی پی ایس ایکٹ کی متعلقہ کی دفعہ کے تحت انجام دی۔ یہ کارروائی پولیس اسٹیشن نگین میں درج ایک ایف آئی آر زیر متعلقہ دفعات این ڈی پی ایس ایکٹ اور پولیس اسٹیشن گاندربل میں درج ایک ایف آئی آر زیر متعلقہ دفعات این ڈی پی ایس ایکٹ کے سلسلے میں عمل میں لائی گئی۔
تحقیقات کے دوران یہ بات سامنے آئی کہ مذکورہ جائیداد منشیات کی اسمگلنگ سے حاصل شدہ آمدنی سے غیر قانونی طور پر بنائی گئی تھی۔
پولیس کے مطابق ضبطی کے حکم کے تحت مالک کو اس جائیداد کو فروخت کرنے، لیز پر دینے، منتقل کرنے، اس میں تبدیلی کرنے یا کسی تیسرے فریق کو اس میں دلچسپی دینے سے روک دیا گیا ہے۔
سرینگر پولیس نے معاشرے سے منشیات کے ناسور کے خاتمے کے عزم کا اعادہ کرتے ہوئے کہا کہ منشیات کی اسمگلنگ میں ملوث عناصر کے خلاف سخت کارروائیاں آئندہ بھی جاری رہیں گی۔ پولیس نے عوام سے بھی اپیل کی کہ وہ منشیات فروشی سے متعلق معلومات فراہم کر کے معاشرے کو منشیات سے پاک بنانے میں تعاون کریں۔
