سی بی آئی نے نوئیڈا میں گھر خریداروں سے دھوکہ دہی کے معاملے میں ساتویں فردِ جرم داخل کی

نئی دہلی 11 مئی (یو این آئی) مرکزی تحقیقاتی بیورو (سی بی آئی) نے گھر خریداروں کے ساتھ بڑے پیمانے پر دھوکہ دہی کی جاری تحقیقات میں پیر کے روز میسرز سیکوئل بلڈ ٹیک پرائیویٹ لمیٹڈ کے خلاف چارج شیٹ داخل کر دی ہے۔ میسرز سیکوئل بلڈ ٹیک پرائیویٹ لمیٹڈ اور اس کے ڈائریکٹرز پر اتر پردیش کے نوئیڈا میں ایک رہائشی منصوبے سے متعلق مبینہ دھوکہ دہی کے الزام میں فردِ جرم عائد کی گئی ہے۔
سی بی آئی کی جانب سے کی گئی تحقیقات میں یہ بات سامنے آئی ہے کہ بلڈر کمپنی اور ان کے ڈائریکٹرز نے سادہ لوح گھر خریداروں اور سرمایہ کاروں کو جھوٹے بھروسے، جھوٹی پیشکشوں اور جھوٹے وعدوں کے ذریعے ان کے خلاف مجرمانہ سازش رچی اور بدنیتی سے ان سے رقم حاصل کی۔
سی بی آئی نے مجاز عدالت کے سامنے تعزیرات ہند کی دفعات کے تحت مجرمانہ سازش، دھوکہ دہی اور امانت میں خیانت کے الزامات میں چارج شیٹ داخل کی ہے۔ سپریم کورٹ کی ہدایت کے مطابق سی بی آئی اس وقت پورے ملک میں 50 معاملات کی تحقیقات کر رہی ہے جن میں مختلف بلڈر کمپنیوں اور مالیاتی اداروں کے نامعلوم عہدیداروں کے خلاف گھر خریداروں سے دھوکہ دہی اور رقم کی غیر قانونی منتقلی جیسے معاملات شامل ہیں۔ اس سے پہلے سی بی آئی ایسے چھ معاملات میں چارج شیٹ داخل کر چکی ہے جن میں میسرز رودر بلڈ ویل کنسٹرکشنز پرائیویٹ لمیٹڈ اور اس کے ڈائریکٹر، میسرز ڈریم پروکون پرائیویٹ لمیٹڈ اور اس کے ڈائریکٹر، جے پی انفرا ٹیک لمیٹڈ اور اس کے ڈائریکٹر، میسرز اے وی جے ڈیولپرز (انڈیا) پرائیویٹ لمیٹڈ اور اس کے ڈائریکٹر، بعض بینکوں اور مالیاتی اداروں کے افسران، میسرز سی ایچ ڈی ڈیولپرز پرائیویٹ لمیٹڈ اور اس کے ڈائریکٹر اور میسرز شبھ کامنا بلڈ ٹیک پرائیویٹ لمیٹڈ اور اس کے ڈائریکٹر شامل ہیں۔