حج ضوابط کی خلاف ورزی پر 5 افراد گرفتار

مکہ مکرمہ، 6 مئی (یو این آئی) سعودی عرب میں سکیورٹی فورسز حج ضوابط کی خلاف ورزیوں پر کارروائیاں جاری رکھے ہوئے ہیں۔ تازہ کارروائی میں مزید 5 افراد کو گرفتار کرلیا گیا۔
سعودی خبر رساں ادارے کی رپورٹ کے مطابق سوشل میڈیا پر حج خدمات سے متعلق جعلی اور گمراہ کن اشتہارات پوسٹ کرنے پر قصیم ریجن میں پولیس نے ایک شامی باشندے اور دو شہریوں کو دھوکہ دہی کے الزام میں گرفتار کیا ہے۔ مکہ مکرمہ پولیس نے ایک یمنی باشندے کو دھوکہ دہی اور مکہ میں داخلے کے جعلی پرمٹ جاری کرنے کے الزام میں گرفتار کیا ہے۔
رپورٹس کے مطابق سوشل میڈیا پر حج خدمات کے جعلی اور گمراہ کن اشتہارات پوسٹ کرنے پر ایک غیرملکی کو گرفتار کیا گیا۔ قانونی کارروائی کے بعد تمام افراد کو پبلک پراسیکیوشن کے حوالے کر دیا گیا۔
یاد رہے حج ضوابط کی خلاف ورزی پر 20 ہزار ریال تک جرمانے اور سخت سزاؤں کا انتباہ یکم ذی القعدہ سے 14 ذی الحجہ تک کیلیے ہے۔