امریکہ نے یوکرین کے لئے اسلحہ فروخت پیکیج منظور کر لیا

واشنگٹن، 6 مئی (یو این آئی) امریکہ نے یوکرین کے لئے 373.6 ملین ڈالر مالیت کے اسلحہ فروخت پیکیج کی منظوری دے دی ہے
امریکہ وزارت خارجہ کے جاری کردہ بیان کے مطابق یوکرین کے لیے 373.6 ملین ڈالر مالیت کے اور جی پی ایس گائیڈڈ بم کِٹوں پر مشتمل اسلحے کی فروخت کی منظوری دے دی گئی ہے۔
منگل کے روز جاری کردہ بیان میں وزارت نے کہا ہے کہ ‘فارن ملٹری سیلز پروگرام کے تحت کییف کو جوائنٹ ڈائریکٹ اٹیک امیونیشن۔ایکسٹینڈڈ رینج (JDAM-ER) کِٹیں اور متعلقہ سازوسامان کی فروخت کی اجازت دے دی گئی ہے۔
اسلحہ فروخت پیکیج میں 1200 عددKMU-572 JDAM ٹیل کٹیں اور 332عدد KMU-556 JDAM ٹیل کٹیں شامل ہیں۔اس کے علاوہ پیکیج میں فیوز سسٹم، اسپیئر پارٹس، لاجسٹک سپورٹ اور تکنیکی دستاویزات بھی شامل ہیں۔
بیان میں کہا گیا ہے کہ ” مجوزہ فروخت، یورپ میں سیاسی استحکام اور معاشی ترقی کے ایک اہم شراکت دار ملک کی سلامتی کو مضبوط بنانے کی وجہ سے، امریکہ کی خارجہ پالیسی اور قومی سلامتی کے اہداف سے ہم آہنگ ہے۔
وزارت نے مزید کہاہے کہ "یہ فروخت یوکرین کی دفاعی صلاحیت کو بہتر بنائے گی۔ خاص طور پر فضائی دفاع کو مضبوط کرکےیوکرین کو موجودہ اور مستقبل کے خطرات کا مقابلہ کرنے اور علاقائی سلامتی کے فرائض سر انجام دینے کا اہل بنائے گی۔ یوکرین کو اس سازوسامان اور خدمات کو اپنی مسلح افواج میں شامل کرنے میں کوئی مشکل پیش نہیں آئے گی”۔
بیان میں امریکہ وزارتِ خارجہ نے زور دیا ہےکہ مجّوزہ فروخت سے "خطے میں بنیادی فوجی توازن تبدیل نہیں ہوگا اور امریکہ کی دفاعی تیاری پر بھی کوئی منفی اثر نہیں پڑے گا”۔
واضح رہے کہ فروری 2022 میں یوکرین۔روس جنگ شروع ہونے کے بعد سے امریکہ ، فوجی اور انسانی امداد کی صورت میں، کییف کو تقریباً 187 ارب ڈالر فراہم کر چُکا ہے۔