راج ناتھ نے اٹلی کے وزیر دفاع کے ساتھ دو طرفہ مذاکرات کیے، مغربی ایشیا کی صورتحال پر بھی بات ہوئی

نئی دہلی، 30 اپریل (یو این آئی) ہندوستان اور اٹلی نے دفاعی صنعتی شعبے کے ساتھ ساتھ افواج کی سطح پر باہمی تعاون بڑھانے پر اتفاق کیا ہے۔ دونوں ممالک نے ایک دو طرفہ فوجی تعاون کے منصوبے پر بھی رضامندی ظاہر کی ہے اور ساتھ ہی مغربی ایشیا کی موجودہ صورتحال پر تبادلہ خیال کیا۔
وزیر دفاع راج ناتھ سنگھ نے جمعرات کو یہاں اٹلی کے وزیر دفاع گوئیڈو کروسیٹو کے ساتھ دو طرفہ ملاقات کی، جس میں دونوں وزراء نے اس بات کا اعادہ کیا کہ ہندوستان اور اٹلی کے درمیان اسٹریٹجک شراکت داری امن، استحکام، آزادی اور باہمی احترام جیسی مشترکہ اقدار پر مبنی ہے۔
دہلی کینٹ میں واقع مانک شا سینٹر میں ہونے والی اس گفتگو کے بعد مسٹر سنگھ نے سوشل میڈیا پلیٹ فارم ‘ایکس’ پر اپنی بات رکھی۔ انہوں نے کہا "آج دہلی میں اپنے اطالوی ہم منصب گوئیڈو کروسیٹو کا خیرمقدم کر کے اور ان کے ساتھ تفصیلی مذاکرات کر کے خوشی ہوئی۔ ہم نے علاقائی اور عالمی مسائل بشمول مغربی ایشیا کی موجودہ صورتحال پر تبادلہ خیال کیا۔ ہم نے ہندوستان کے ‘آتم نربھر بھارت’ پروگرام اور اٹلی کے دفاعی تعاون کے اقدام کے تحت باہمی طور پر فائدہ مند دفاعی صنعتی تعاون کو مزید فروغ دینے کے اقدامات پر بھی بات کی۔ دونوں ممالک کی مسلح افواج کے درمیان فوجی روابط سے متعلق سال 2026-27 کے لیے ایک دو طرفہ فوجی تعاون کے منصوبے (ایم سی پی ) کا بھی تبادلہ کیا گیا۔”
وزارت دفاع نے بتایا کہ اس دو طرفہ فوجی تعاون کے منصوبے میں دونوں ممالک کی افواج کے درمیان فوجی سرگرمیوں کی سمت کا تعین کیا گیا ہے۔ میٹنگ میں دونوں قدیم بحری ممالک کے درمیان مختلف اہم سمندری امور پر ہم آہنگی کا بھی ذکر کیا گیا، جس میں گروگرام میں واقع ‘انفارمیشن فیوژن سینٹر-ہند بحر الکاہل خطہ’ کے ذریعے معلومات کا تبادلہ بھی شامل ہے۔
مذاکرات سے قبل، اطالوی وزیر دفاع نے نیشنل وار میموریل پر پھولوں کی چادر چڑھائی اور ملک کی خدمت میں عظیم قربانی دینے والے ہیروز کو خراج عقیدت پیش کیا۔ مانک شا سینٹر پہنچنے پر اطالوی وزیر دفاع کو گارڈ آف آنر بھی پیش کیا گیا۔