شوپیاں؍ یکم مئی
جنوبی کشمیر کے ضلع شوپیاں میں ایک ندی میں گر کر لاپتہ ہونے والے پلوامہ کے چار سالہ بچے کی لاش جمعہ کے روز ہیرپورہ علاقے میں رمبی آرا نالہ سے برآمد کر لی گئی۔
ایک اہلکار کے مطابق متوفی کی شناخت محمد حنظلہ ساکن ٹیکن گاؤں، پلوامہ کے طور پر ہوئی ہے، جو۲۷؍ اپریل کو ڈبجن پل کے قریب تیز بہاؤ والے نالے میں حادثاتی طور پر گر گیا تھا۔انہوں نے بتایا کہ ندی کے تیز دھار پانی نے بچے کو فوراً اپنے ساتھ بہا لیا تھا۔
اہلکار نے کہا’’پانچ روزہ تلاش آپریشن کے بعد آج صبح بچے کی لاش رمبی آرا نالہ کے نچلے حصے سے برآمد کی گئی‘‘۔انہوں نے مزید بتایا کہ واقعے کے فوراً بعد فوج، جموں و کشمیر پولیس اور اسٹیٹ ڈیزاسٹر ریسپانس فورس(ایس ڈی آر ایف ) کی ٹیموں نے ریسکیو آپریشن شروع کیا تھا۔
اس دوران نالے کے گہرے حصوں کی تلاشی کے لیے خصوصی آلات استعمال کیے گئے جبکہ آپریشن کو تیز کرنے کے لیے اضافی عملہ بھی تعینات کیا گیا۔ ڈوڈہ سے تعلق رکھنے والے ایک معروف رضاکار سمیت ماہر سول باڈی ریٹریورز کو بھی تلاش اور برآمدگی کے عمل میں شامل کیا گیا۔
ادھرڈپٹی کمشنر شوپیاں شیشیر گپتا نے رمبی آرا نالہ سے کمسن بچے محمد حنظلہ کی لاش برآمد کرنے والے وسیع ریسکیو آپریشن میں شامل تمام اداروں اور افراد کی کوششوں کو سراہتے ہوئے ان کا تہہ دل سے شکریہ ادا کیا۔
گپتا نے جموں و کشمیر پولیس، اسٹیٹ ڈیزاسٹر ریسپانس فورس‘ نیشنل ڈیزاسٹر ریسپانس فورس اور بھارتی فوج کی مسلسل اور مربوط کاوشوں کو خراجِ تحسین پیش کیا۔ انہوں نے عوام اور مختلف این جی اوز کے رضاکاروں کا بھی خصوصی شکریہ ادا کیا، جنہوں نے انتظامیہ کے شانہ بشانہ رہ کر اس آپریشن کو کامیاب بنانے میں اہم کردار ادا کیا۔
ڈپٹی کمشنر نے ضلع انتظامیہ کی جانب سے محمد حنظلہ کے غمزدہ خاندان کے ساتھ گہرے دکھ اور افسوس کا اظہار کرتے ہوئے کہا کہ وہ اس مشکل گھڑی میں ان کے ساتھ کھڑے ہیں اور دعا گو ہیں کہ اللہ تعالیٰ اہلِ خانہ کو اس عظیم صدمے کو برداشت کرنے کی ہمت عطا فرمائے۔
