آئی پی ایل 2026: میچ کے دوران ویپنگ کا تنازع، ریان پراگ سے بی سی سی آئی کا جواب طلب

نیو چنڈی گڑھ، 29 اپریل ( یو این آئی ) راجستھان رائلز کے کپتان ریان پراگ اس وقت شدید تنقید کی زد میں آ گئے جب پنجاب کنگز کے خلاف کھیلے گئے آئی پی ایل میچ کے دوران انہیں لائیو کیمرےپرویپنگ (ای سگریٹ کا استعمال) کرتے ہوئے دیکھا گیا۔ بھارتی کرکٹ کنٹرول بورڈ نے واقعے کا نوٹس لیتے ہوئے کھلاڑی سے باضابطہ وضاحت طلب کر لی ہے۔
مہاراجہ یادویندر سنگھ انٹرنیشنل کرکٹ اسٹیڈیم میں کھیلے گئے میچ کی لائیو نشریات کے دوران یہ مناظر کیمرے میں قید ہوئے، جو دیکھتے ہی دیکھتے سوشل میڈیا پر وائرل ہو گئے۔ ریان پراگ کا یہ عمل نہ صرف کھیل کے ضابطہ اخلاق کی خلاف ورزی سمجھا جا رہا ہے بلکہ ہندوستان کے سخت قوانین کی رو سے بھی غیر قانونی ہے۔ ہندوستان میں 2019 سے ای سگریٹ کی فروخت، درآمد اور استعمال پر مکمل پابندی ہے۔
اس قانون کی خلاف ورزی پر 5 لاکھ روپے تک جرمانہ اور قید کی سزا بھی ہو سکتی ہے۔ عوامی مقامات پر ویپنگ کرنا قانوناً جرم ہے۔دلچسپ بات یہ ہے کہ یہ تنازع ایک ایسے میچ کے بعد سامنے آیا جہاں راجستھان رائلز نے 223 رنز کا ہمالیہ جیسا ہدف عبور کر کے شاندار فتح حاصل کی تھی۔
یشسوی جیسوال (51) اور ڈونون فاریرا (52 ناٹ آؤٹ) کی بدولت ٹیم نے 4 گیندیں قبل ہی جیت اپنے نام کر لی۔ ریان پراگ نے اس میچ میں 29 رنز بنائے، تاہم مجموعی طور پر اس سیزن میں ان کی کارکردگی مایوس کن رہی ہے۔ انہوں نے 9 میچوں میں محض 14.62 کی اوسط سے صرف 117 رنز بنائے ہیں۔
یہ پہلا موقع نہیں ہے جب اس سیزن میں راجستھان رائلز کے کسی رکن پر کارروائی ہوئی ہو۔ چند ہفتے قبل ٹیم مینیجر رویندر سنگھ بھنڈر پر رائل چیلنجرز بنگلورو کے خلاف میچ کے دوران ڈگ آؤٹ میں موبائل فون استعمال کرنے پر ایک لاکھ روپے جرمانہ عائد کیا گیا تھا۔
بی سی سی آئی کے ذرائع کا کہنا ہے کہ ریان پراگ کی وضاحت موصول ہونے کے بعد ان کے خلاف مزید تادیبی کارروائی کا فیصلہ کیا جائے گا۔ ماہرین کا ماننا ہے کہ ایک کپتان کی جانب سے اس طرح کا غیر ذمہ دارانہ رویہ نوجوان شائقین کے لیے غلط مثال بن سکتا ہے۔