جموں؍۲۰؍ اپریل
جموں میں گورنمنٹ کالج فار ویمن (جی سی ڈبلیو) گاندھی نگر کے باہر پیر کے روز طلبہ نے ایک طالبہ کی حالیہ حادثے میں موت کے خلاف احتجاج کیا اور ذمہ داروں کے خلاف کارروائی کا مطالبہ کیا۔
احتجاج میں بڑی تعداد میں طلبہ نے کالج کے باہر جمع ہو کر نعرے بازی کی اور اس واقعے پر شدید غم و غصے کا اظہار کیا، جسے انہوں نے لاپرواہی کا نتیجہ قرار دیا۔
یہ احتجاج اس طالبہ انجلی چودھری کی موت کے بعد کیا گیا، جو گورنمنٹ کالج فار ویمن گاندھی نگر جموں کی چوتھے سمسٹر کی طالبہ تھی اور چند روز قبل کالج ٹرپ کے دوران ایک چلتی بس سے گر کر جان کی بازی ہار گئی تھی۔
طلبہ نے جوابدہی کا مطالبہ کرتے ہوئے حکام سے اپیل کی کہ ذمہ دار افراد کے خلاف سخت کارروائی کی جائے۔
احتجاج کے پیش نظر علاقے میں امن و امان برقرار رکھنے کے لیے پولیس اہلکار تعینات کیے گئے تھے۔کچھ وقت تک صورتحال کشیدہ رہی، جبکہ طلبہ اپنا احتجاج جاری رکھے ہوئے تھے اور سیکورٹی فورسز صورتحال پر نظر رکھے ہوئے تھیں۔
