رشبھ پنت کا دشمن کوئی اور نہیں، وہ خود ہیں: نوجوت سنگھ سدھو کی تیکھی تنقید

بنگلورو،16 اپریل ( یو این آئی)آئی پی ایل 2026 میں رائل چیلنجرز بنگلورو نے لکھنؤ سپر جائنٹس کے خلاف 5 وکٹوں سے شاندار کامیابی حاصل کر کے پوائنٹس ٹیبل پر پہلی پوزیشن حاصل کر لی ہے۔ ایک پروگرام ‘کرکٹ لائیو میں گفتگو کرتے ہوئے نوجوت سنگھ سدھو اور پیوش چاؤلہ نے ویراٹ کوہلی کی کلاس، کرونال پانڈیا کی اسمارٹ بولنگ اور رشبھ پنت کی کپتانی میں لکھنؤ کی ناکامیوں کا تفصیلی تجزیہ کیا۔نوجوت سنگھ سدھو نے ویراٹ کوہلی کی حالیہ فارم اور اثر انگیزی کی تعریف کرتے ہوئے کہا”ویراٹ کوہلی اگر اپنے 20 فیصد پر بھی ہوں، تو وہ دوسروں کے 100 فیصد سے بہتر ثابت ہوتے ہیں۔”
انہوں نے محمد شامی جیسے تجربہ کار بولر کے خلاف کوہلی کے کور ڈرائیوز، پل اور کٹ شاٹس کو بے مثال قرار دیا اور کہا کہ 19 سال بعد بھی ان کا ٹائمنگ اور کلاس آئی پی ایل کے لیے ناگزیر ہے۔لکھنؤ کی ٹیم کی مسلسل ناکامی پر بات کرتے ہوئے سدھو نے کپتان رشبھ پنت کو آڑے ہاتھوں لیا ۔سدھو کا کہنا تھا کہ "مجھے نہیں لگتا کہ بولرز رشبھ پنت کو آؤٹ کر رہے ہیں، بلکہ وہ اپنی غلطیوں کی وجہ سے خود آؤٹ ہو رہے ہیں۔ ان میں ٹیلنٹ کی کمی نہیں، بس انہیں کریز پر خود کو تھوڑا وقت دینے کی ضرورت ہے۔”
انہوں نے نشاندہی کی کہ مارکرم، پورن اور پنت جیسے بڑے ناموں کے باوجود ٹیم میں پارٹنرشپ کی کمی ہے اور ٹاپ آرڈر 50 رنز کی شراکت داری بنانے میں بھی ناکام رہا ہے۔