خواتین کو بااختیاربنانے کے لیے زندگی کے ہر مرحلے کے لیے منصوبہ بندی کر رہی ہے حکومت: مودی

نئی دہلی، 13 اپریل (یو این آئی) وزیراعظم نریندر مودی نے پیر کو کہا کہ حکومت خواتین کو حقیقی معنوں میں بااختیاربنانے کے لیے زندگی کے ہر مرحلے کے لیے خصوصی منصوبے بنا رہی ہے اور انہیں کامیابی کے ساتھ نافذ کیا جا رہا ہے مسٹر مودی نے جمعرات کو پارلیمنٹ میں ہونے والی خواتین کے ریزرییشن بل پر بحث اور منظوری سے قبل اس کے پس منظر میں یہاں منعقدہ ‘ناری شکتی وندن کانفرنس’ سے خطاب کرتے ہوئے کہا، "ہماری حکومت نے خواتین کوبااختیار بنانے لیئے زندگی کے ہر مرحلے کے لیے اسکیمیں بنائیں اور انہیں کامیابی سے نافذ کیا ہے۔” انہوں نے کہا کہ جدوجہدِ آزادی سے لے کر دستور ساز اسمبلی کے فیصلوں تک، آزاد ہندوستان کی بنیاد رکھنے میں ہندوستان کی ناری شکتی نے لا محدود تعاون دیا ہے اور ملک میں خواتین کی قیادت کی بہترین مثال پنچایتی راج ادارے ہیں۔
وزیراعظم نے کہا کہ حکومت ترقی پسند معاشرے کے تصور کو شرمندہ تعبیر کرنے کے مقصد سے کئی چھوٹے بڑے اقدامات کے ذریعے خواتین کو بااختیار بنا رہی ہے۔ انہوں نے کہا کہ خواتین کے ریزرویشن بل کے ذریعے لوک سبھا اور اسمبلیوں میں خواتین کو ایک تہائی ریزرویشن دے کر اب ملک خواتین کو بااختیار بنا کر جمہوریت کو بھی نئے انداز سے مضبوط کرنے جا رہا ہے۔
انہوں نے کہا، "آج خواتین ان شعبوں میں بھی بلندیوں کو چھو رہی ہیں جہاں کبھی مردوں کی اجارہ داری سمجھی جاتی تھی۔ ملک کی ناری شکتی نے اپنی محنت، ہمت اور خود اعتمادی سے نئی بلندیوں کو چھوا ہے۔ اب ہمیں مل کر اس طاقت کو نئی توانائی دینی ہے اور اس کے لیے مواقع کو وسعت دینی ہے۔”
مسٹر مودی نے کانفرنس میں موجود خواتین کو یقین دلایا کہ حکومت ان کی امنگوں کو پورا کرنے کے لیے مسلسل اقدامات کر رہی ہے۔ انہوں نے کہا، "میں سب کو یقین دلانا چاہتا ہوں کہ ملک ان کی خواہشات کو سمجھتا ہے اور انہیں پورا کرنے کے لیے اقدامات کر رہا ہے۔”
مسٹر مودی نے خواتین سے اپیل کی کہ وہ خواتین کے ریزرویشن بل کو منظور کرانے کے لیے تمام اراکینِ پارلیمنٹ کو اعتماد میں لیں اور انہیں اس کی حمایت کے لیے تیار کریں۔ انہوں نے کہا کہ اس کانفرنس میں ہونے والی بحث کو ملک کے کونے کونے تک ہر خاتون تک پہنچایا جانا چاہیے۔
انہوں نے کہا، "خواتین اراکینِ پارلیمنٹ سے مل کر اپنا موقف پیش کریں اور اپنی خواہشات کا اظہار کریں۔” وزیراعظم نے کہا کہ وہ تمام ماؤں اور بہنوں سے اپیل کرتے ہیں کہ جس دن یہ بل پارلیمنٹ میں آئے، اس دن اراکینِ پارلیمنٹ کو پھولوں کے ہار پہنا کر رخصت کریں تاکہ وہ اس مثبت فیصلے میں شراکت دار بنیں۔
انہوں نے کہا کہ آج کے دن سبھی عہد کریں کہ ناری شکتی کے پاس حقوق بھی رہیں گے اور وہ فیصلہ سازی کی طاقت میں شراکت دار بھی بنے گی۔ مسٹر مودی نے کہا کہ اگرچہ یہ لوک سبھا کے اسپیکر اور راجیہ سبھا کے چیئرمین کا اختیار ہے، لیکن وہ چاہتے ہیں کہ اس بل پر بحث کے دوران پارلیمنٹ کی وزیٹرز گیلری خواتین سے بھری رہے۔ انہوں نے کہا کہ اس سے ملک میں جشن کا ماحول بنے گا۔
انہوں نے کہا کہ اس کامیابی کا تمام تر سہرا ملک کی ماترشکتی ، پارلیمنٹ اور تمام جماعتوں کو جاتا ہے۔