ڈی آئی پی آر
سرینگر؍۱۱ ؍اپریل
وزیر اعلیٰ عمر عبداللہ نے شیرِ کشمیر یونیورسٹی آف ایگریکلچرل سائنسز اینڈ ٹیکنالوجی کشمیر کو مورل (گُچی) مشروم کی تحقیق اور ترقی میں اہم سائنسی پیش رفت حاصل کرنے پر دلی مبارکباد پیش کی ہے۔
وزیر اعلیٰ، جو یونیورسٹی کے پرو چانسلر بھی ہیں، نے اس کامیابی کو سائنسی برتری اور قیمتی قدرتی وسائل کے فروغ کے لیے اسکوَاسٹ کی مسلسل وابستگی کا مظہر قرار دیا۔
عمرعبداللہ نے کہا کہ یہ پیش رفت خاص طور پر پہاڑی اور دیہی علاقوں میں روزگار کے مواقع بڑھانے کی بڑی صلاحیت رکھتی ہے، جہاں گُچی مشروم نہ صرف ایک اہم معاشی وسیلہ ہے بلکہ مقامی ثقافت کا بھی حصہ ہے۔
وزیر اعلیٰ نے اس بات پر زور دیا کہ یونیورسٹی کی یہ کوششیں پائیدار کاشت، ویلیو ایڈیشن اور آمدنی میں اضافے کے نئے امکانات پیدا کریں گی۔
وزیر اعلیٰ نے اس تحقیق میں شامل سائنسدانوں کی محنت اور لگن کو بھی خصوصی طور پر سراہا۔
عمرعبداللہ نے نیک خواہشات کا اظہار کرتے ہوئے امید ظاہر کی کہ اسکوَاسٹ کشمیر کے سائنسدان اور محققین آئندہ بھی اسی طرح کامیابیاں حاصل کرتے رہیں گے اور زرعی جدت اور دیہی خوشحالی میں نمایاں کردار ادا کریں گے۔
