بھدرواہ؍۱۱؍اپریل
جموں و کشمیر کے ضلع ڈوڈہ کے بھدرواہ میں واقع ایک صدی قدیم تعلیمی ادارہ، بوائز ہائیر سیکنڈری اسکول، کو ہیریٹیج اسکول میں تبدیل کرنے کا فیصلہ کیا گیا ہے، جس سے اس تاریخی ادارے کو نئی شناخت ملے گی۔
۱۰۶ سال پرانے اس ادارے کی۳ء۰۶ کروڑ روپے کی لاگت سے ازسرنو تعمیر کے منصوبے کا سنگ بنیاد ایڈیشنل ڈپٹی کمشنر بھدرواہ سنیل کمار بھٹیال نے اسکول کے پرنسپل اور سابق طالب علم کیلاش چندر کی موجودگی میں رکھا۔
یہ اسکول، جو پہلے امر سنگھ ہائی اسکول کے نام سے جانا جاتا تھا، بھدرواہ شہر میں واقع ہے اور۱۹۲۰ میں اُس وقت کے ڈوگرہ حکمران مہاراجہ پرتاپ سنگھ نے قائم کیا تھا۔ یہ چناب وادی کا پہلا ہائی اسکول بھی تھا۔
حکام کے مطابق ’پریرنا‘ ہیریٹیج اسکول اسکیم کے تحت اس منصوبے کا مقصد طلبہ کے لیے ایک ایسا تعلیمی ماحول فراہم کرنا ہے جو انہیں تاریخی پس منظر کے ساتھ جدید تعلیمی تجربہ بھی دے۔
انہوں نے کہا کہ اس اقدام سے نہ صرف طلبہ کو ایک متاثر کن تعلیمی ماحول میسر آئے گا بلکہ اس ادارے سے وابستہ سابق طلبہ میں بھی فخر کا احساس پیدا ہوگا، کیونکہ یہ تاریخی اسکول تحفظ اور تجدید کے نئے دور میں داخل ہو رہا ہے۔
