ایجنسیز
سرینگر؍۱۱؍اپریل
کانگریس نے ہفتہ کے روز جموں و کشمیر کو ریاستی درجہ بحال کرنے میں ’’طویل تاخیر‘‘ کو ناقابل قبول قرار دیتے ہوئے کہا کہ پارٹی عوام کے حقوق کے تحفظ کے لیے اپنی جدوجہد جاری رکھے گی۔
جموں و کشمیر پردیش کانگریس کمیٹی کا ایک جائزہ اجلاس یہاں پارٹی دفتر میں منعقد ہوا، جس میں کشمیر کے مختلف اضلاع سے کوآرڈینیٹرز اور ضلع صدور نے شرکت کی۔ اجلاس کی صدارت جے کے پی سی سی صدر طارق حمید قرہ نے کی۔
قرہ نے مختلف اضلاع میں پارٹی سرگرمیوں سے متعلق فیڈبیک کا جائزہ لیا۔ اجلاس میں پارٹی کے مقامی پروگرام ’’ہماری ریاست ہمارا حق‘‘ پر بھی تفصیلی تبادلہ خیال کیا گیا، جسے ریاستی درجہ کی بحالی کے مطالبے کے لیے شروع کیا گیا ہے۔
انہوں نے پارٹی رہنماؤں کو ہدایت دی کہ اس پروگرام میں عوام کی فعال شمولیت کو یقینی بنایا جائے تاکہ مرکز کو واضح پیغام دیا جا سکے کہ ریاستی درجہ کی بحالی میں تاخیر ناقابل قبول ہے اور کانگریس اس کے لیے اپنی جدوجہد جاری رکھے گی۔
قرہ نے کہا، ’’ہمیں تمام اضلاع میں نچلی سطح پر اپنی سیاسی سرگرمیوں کو مزید تیز کرنا ہوگا اور پارٹی کی اس مقامی تحریک میں عوام کی شمولیت کو یقینی بنانا ہوگا۔‘‘
کانگریسی لیڈر نے کہا کہ عوام کو کانگریس سے بڑی توقعات وابستہ ہیں۔ان کاکہنا تھا’’لوگ جانتے ہیں کہ کانگریس ہی وہ واحد جماعت ہے جو ان کے حقوق کے تحفظ اور ان کے جائز مسائل کے حل کے لیے مؤثر آواز اٹھا سکتی ہے۔ کانگریس عوام کی امنگوں کی نمائندگی کرتی ہے اور ان کی خدمت کے لیے پُرعزم ہے‘‘۔
قرہ نے مزید کہا، ’’ہم ہر طرح کے چیلنجز کا مقابلہ کرنے کے لیے تیار ہیں اور سیاسی طور پر ان پر قابو پانے کی صلاحیت رکھتے ہیں۔‘‘
